Toshkent viloyatida bir qizni zo‘rlaganlikda gumon qilingan Milliy gvardiya Qo‘riqlash bosh boshqarmasi xodimiga nisbatan jinoyat ishi qo‘zg‘atildi. Bu haqda idora matbuot xizmati xabar berdi.
Qayd etilishicha, M.N. ismli fuqaroning Toshkent viloyati Qo‘riqlash bo‘limi safdor xodimi Sh.Sh.ga nisbatan arizasi Milliy gvardiyaga “Nemolchi.uz” loyihasi faoli tomonidan yuborilgan. Mazkur arizada fuqaro 2019-yilda Sh.Sh. tomonidan zo‘rlanganini bayon etgan.
Maʼlumot uchun, xodim Sh.Sh. 2020-yil fevral oyida ishga qabul qilingan. Jabrlanuvchi huquqni muhofaza qilish organlariga birinchi marta 2022-yilda ariza bilan murojaat qilgan.
Shundan so‘ng, fuqaro M.N.ning arizasi Bosh prokuraturada belgilangan tartibda ko‘rib chiqish uchun taqdim etilgan. 4-aprel kuni mazkur holat yuzasidan Toshkent viloyati prokuraturasi tomonidan Jinoyat kodeksining 118-moddasi 4-qismi bilan jinoyat ishi qo‘zg‘atilgan.
“Xodim Sh.Sh.ning kelgusida Qo‘riqlash bo‘limida xizmat o‘tashi to‘g‘risidagi qaror tergov natijalariga ko‘ra qabul qilinadi”, — deyiladi xabarda.
Xorazmda oilaviy bolalar uyi rahbari uch nafar voyaga yetmagan tarbiyalanuvchini 10 oy davomida viloyat adliya boshqarmasi va tuman favqulodda vaziyatlar bo‘limi boshliqlari bilan jinsiy aloqada bo‘lishga majburlagani haqida xabar berilgandi. Avvalroq ushbu holat yuzasidan munosabat bildirgan Prezident administratsiyasi sho‘ba mudiri Saida Mirziyoyeva qonunchilikda jiddiy muammolar borligi va ushbu bo‘shliqdan jirkanch shaxslar foydalanib qolayotganini alohida qayd etib, Bosh prokuraturadan mazkur holatga alohida e’tibor qaratib, sinchiklab o‘rganishni va huquqiy baho berishni so‘ragandi.
Prezident administratsiyasi rahbari o‘rinbosari Komil Allamjonov pedofillarga nisbatan kimyoviy kastratsiya jazosini qo‘llash yuzasidan qonunchilikka o‘zgartirish kiritish vaqti kelganini aytgandi. Bolalar ombudsmani ham mehribonlik uyi qizlariga nisbatan qo‘llanadigan har qanday jinsiy jinoyatlarga og‘ir jazo turlarini qo‘llash kerak, degan pozitsiyada.
Izoh (1)
Тўғрикуя. Лекин ўтган сафар андижон шахар хокими дилмурод шундай видеоси чиқиб кетганида ўша инсон шаъни, қадр қиммати хақидаги қонунлар йўқмиди? Ёки бу қонун фақат вилоят хокими ёки ундан баланд тоифадаги мансабдорлар учун ишлайдими? Ундан пастроқ тоифадаги одамлар учун ишламайдими?