Andijon, Jizzax hamda Farg‘ona viloyatlarida elektr tarmoqlariga noqonuniy ulanish holatlari fosh etildi, deb xabar beradi Bosh prokuratura huzuridagi departament.
Qayd etilishicha, departamentning Andijon shahar bo‘limi tomonidan ETK xodimlari bilan hamkorlikda tergovga qadar tekshiruv o‘tkazilgan. Unda yakka tartibdagi tadbirkor A.S. va boshqalar “S.S.” nomli kafeni hech qanday hujjatsiz umumiy foydalanishdagi elektr tarmog‘iga o‘zboshimchalik bilan ulab, 1,5 million kVt/s elektr energiyasidan noqonuniy foydalanib kelgani aniqlangan.
Shuningdek, Mirzacho‘l tumanidagi “I.P.” MCHJ viloyat filiali rahbari D.N. va boshqalar kompyuter savodxonligi bo‘yicha o‘quv markaz binosini hech qanday hujjatsiz umumiy foydalanishdagi elektr tarmog‘iga o‘zboshimchalik bilan ulab, 233,5 ming kVt/s elektr energiyasidan noqonuniy foydalangani ma’lum bo‘ldi.
Xuddi shuday, departamentning Asaka tuman bo‘limi tomonidan ETK xodimlari bilan hamkorlikda o‘tkazilgan tergovga qadar tekshiruvda, “G.M.A.” MCHJ masʼul shaxslari va boshqalar qozon ishlab chiqarish sexini “PK elektro hisob” dasturida mavjud bo‘lmagan elektr hisoblash uskunasiga ulab, 163,2 ming kVt/s elektr energiyasidan noqonuniy foydalangani aniqlangan.
Departamentning Bag‘dod tumani bo‘limi tomonidan esa “S.Sh.” fermer xo‘jaligi ish yurituvchisi G‘.A. va boshqalar ushbu fermer xo‘jaligiga qarashli yer maydonini sug‘orish uchun suv nasosini umumiy foydalanishdagi elektr tarmog‘iga o‘zboshimchalik bilan ulab, 116,5 ming kVt/s elektr energiyasidan noqonuniy foydalanganliklari aniqlangan.
Ushbu qonunbuzilish holatlari oqibatida davlat va jamiyat manfaatlariga jami 913,5 million so‘m zarar yetkazilgan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilib, tergov xarakatlari o‘tkazilmoqda.
Izoh (0)