Toshkent shahri Chilonzor tumanida imtiyozli shartlar asosida fuqarolarga xonadon olib berishni va’da qilgan MChJ rahbari va boshqalar aniqlandi, deya xabar bermoqda Bosh prokuratura huzuridagi departament matbuot xizmati.
Ma’lum qilinishicha, departamentning Chilonzor tuman bo‘limi tomonidan fuqarolarning huquq va manfaatlarini himoya qilish yuzasidan o‘tkazilgan tergovga qadar tekshiruvda “B” MCHJ rahbari U.G., yordamchisi R.D. va boshqalar noqonuniy boylik orttirish maqsadida turli xil tadbirlar o‘tkazish yo‘li bilan fuqarolarning ishonchini suiiste’mol qilgan.
Ular go‘yoki o‘zlari rahbarlik qilayotgan MChJ orqali ko‘p qavatli turar joy binosini qurishda ulushli ishtirok etish to‘g‘risida yuzaki “fiktiv” shartnomalar tuzib, xonadonlarni imtiyozli shartlar asosida olib berishni va’da qilib, 31 nafar fuqaroning 25 000 AQSh dollari va 291 million so‘mini firibgarlik yo‘li bilan qo‘lga kiritgani aniqlangan.
Mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Buxoroda bojxona inspektori xizmati evaziga 400 dollar olayotganida qo‘lga olingani, O‘zbekistonda 1 mln dollarlik yaxlit kupyura sotayotgan shaxs ushlangani hamda Chirchiqda tadbirkorning 33 ming dollarini qo‘lga kiritib, uni totalizatorda yutqazib qo‘ygan shaxsga jinoiy ish ochilgani haqida xabar berilgandi.
Izoh (0)