So‘rovnomada qatnashgan amerikaliklarning yarmidan ko‘pi Ukrainaga yangi yordam paketi ajratilishiga qarshi — CNN

Amerikaliklar o‘rtasida o‘tkazilgan so‘rovnomada qatnashganlarning yarmidan ko‘pi Kongressning Ukrainaga yangi yordam paketlarini ma’qullashiga qarshi chiqdi.

CNN  buyurtmasi asosida SSRS tomonidan o‘tkazilgan so‘rovga ko‘ra, ishtirokchilarning 55 foizi Ukrainani qo‘llab-quvvatlash uchun qo‘shimcha mablag‘ ajratilishiga qarshi. Shu bilan birga, respondentlarning 45 foizi Kongress bunday yordamga ruxsat berishi kerak, deb hisoblaydi.

AQSH Ukrainani qo‘llab-quvvatlash uchun ko‘proq harakat qilishi kerak degan amerikaliklarning aksariyati razvedka ma’lumotlarini yig‘ish (75 foiz), harbiy tayyorgarlik (68 foiz) va qurol-yarog‘ (60 foiz) bo‘yicha yordam berish tarafdori.

AQSH allaqachon yetarlicha yordam berganini aytadiganlar orasida faqat razvedka ma’lumotlarini to‘plashga yordamlashish zarur deya hisoblaydiganlar 52 foiz.

Shuningdek, respondentlarning yarmidan ko‘pi – 56 foizi Ukrainadagi qurolli mojaro AQSH milliy xavfsizligiga tahdid solishidan xavotirda.

So‘rov 1-iyuldan 31-iyulgacha 1 279 nafar katta yoshdagilar o‘rtasida onlayn yoki telefon orqali o‘tkazildi. 

Davlat departamenti ma’lumotlariga ko‘ra, 2021-yilning yanvar oyidan beri Qo‘shma Shtatlar Ukraina xavfsizligini qo‘llab-quvvatlash uchun 44 milliard dollardan ko‘proq sarmoya kiritgan, shulardan 43 milliard dollardan ko‘prog‘i 2022-yil fevralidan keyin ajratilgan.