Сўровномада қатнашган америкаликларнинг ярмидан кўпи Украинага янги ёрдам пакети ажратилишига қарши — CNN

Америкаликлар ўртасида ўтказилган сўровномада қатнашганларнинг ярмидан кўпи Конгресснинг Украинага янги ёрдам пакетларини маъқуллашига қарши чиқди.

CNN  буюртмаси асосида SSRS томонидан ўтказилган сўровга кўра, иштирокчиларнинг 55 фоизи Украинани қўллаб-қувватлаш учун қўшимча маблағ ажратилишига қарши. Шу билан бирга, респондентларнинг 45 фоизи Конгресс бундай ёрдамга рухсат бериши керак, деб ҳисоблайди.

АҚШ Украинани қўллаб-қувватлаш учун кўпроқ ҳаракат қилиши керак деган америкаликларнинг аксарияти разведка маълумотларини йиғиш (75 фоиз), ҳарбий тайёргарлик (68 фоиз) ва қурол-яроғ (60 фоиз) бўйича ёрдам бериш тарафдори.

АҚШ аллақачон етарлича ёрдам берганини айтадиганлар орасида фақат разведка маълумотларини тўплашга ёрдамлашиш зарур дея ҳисоблайдиганлар 52 фоиз.

Шунингдек, респондентларнинг ярмидан кўпи – 56 фоизи Украинадаги қуролли можаро АҚШ миллий хавфсизлигига таҳдид солишидан хавотирда.

Сўров 1 июлдан 31 июлгача 1 279 нафар катта ёшдагилар ўртасида онлайн ёки телефон орқали ўтказилди. 

Давлат департаменти маълумотларига кўра, 2021 йилнинг январь ойидан бери Қўшма Штатлар Украина хавфсизлигини қўллаб-қувватлаш учун 44 миллиард доллардан кўпроқ сармоя киритган, шулардан 43 миллиард доллардан кўпроғи 2022 йил февралидан кейин ажратилган.