“Mutlaqo qonuniy”. UXX rahbari Rossiya kemalariga qilingan dron hujumiga izoh berdi

Ukraina xavfsizlik xizmati rahbari Vasiliy Malyuk dengiz dronlarining Rossiya kemalariga qilgan hujumiga izoh berar ekan, bunday operatsiyalar “mutlaqo qonuniy” ekanini aytdi. Uning bayonoti UXX Telegram kanalida e’lon qilindi.

Malyukning so‘zlariga ko‘ra, Rossiya kemalarida yoki Qrim ko‘prigida sodir bo‘ladigan har qanday “qasir-qusur” dushmanga nisbatan mutlaqo mantiqiy va samarali qadamdir.

Bunday maxsus operatsiyalar Ukraina hududiy suvlarida o‘tkazilyapti va ular mutlaqo qonuniy. Shunday ekan, agar ruslar “qasir-qusur” to‘xtatilishini istasa, yagona imkoniyatdan foydalanishi kerak — Ukrainaning hududiy suvlari va yerimizdan ketishi kerak. Buni qancha tez qilsa, ularga shuncha yaxshi bo‘ladi. Chunki biz bu urushda dushmanni to‘liq yengamiz, — dedi Malyuk.

4-avgust kuni ertalab Rossiya Mudofaa vazirligi Novorossiysk harbiy-dengiz bazasiga ikkita harbiy dron hujum qilgani, hujum qaytarilganini ma’lum qildi. Urush tarafdori bloggerlar Novorossiyskda “Olenegorskiy gornyak” desant kemasi shikastlangani haqida xabar berdi. Ukraina ommaviy axborot vositalari buni UXXning maxsus operatsiyasi deb atadi.

Bugun, 5-avgust kuni ertalab Kerch bo‘g‘ozi hududida bo‘lgan Rossiyaning Sig tankeriga dengiz droni kelib urildi. Tankerning dvigatel joylashgan qismi shikastlangan. Ukraina OAV manbalarga tayanib, bu ham UXX maxsus operatsiya bo‘lganini xabar qildi.