Xitoyning Rossiyadagi elchixonasi ma’lum qilishicha, Rossiya huquq-tartibot idoralari besh nafar Xitoy fuqarosini chegarada bir necha soat davomida so‘roq qilgan va ularga kirishga ruxsat bermagan. Elchixona bunday xatti-harakatlarni “shafqatsiz” deb atadi. Bu haqda Xitoyning WeChat ijtimoiy tarmog‘iga joylangan diplomatlar bayonotida aytiladi, deb yozmoqda Bloomberg.
Elchixona maʼlumotlariga ko‘ra, 29-iyul kuni besh nafar Xitoy fuqarosi Qozog‘istondan Rossiyaga kirishga uringan. Chegarada ular “to‘rt soat davomida qayta-qayta so‘roqqa tutilgan”, shundan so‘ng ularga mamlakatga kirishga ruxsat berilmagan. Ularning turistik vizalari bekor qilingan, deydi diplomatlar.
“Rossiya huquq-tartibot idoralarining ushbu hodisa bilan bog‘liq shafqatsiz va haddan oshgan harakatlari Xitoy fuqarolarining qonuniy huquq va manfaatlarini jiddiy ravishda buzdi”, — deyiladi xabarda.
Elchixona voqea aks etgan videoni ko‘rib chiqqanidan so‘ng Rossiya Tashqi ishlar vazirligi, Federal xavfsizlik xizmati va chegara xizmatiga o‘z vakillarini yuborib, hodisa sabablarini tushuntirishni va “bunday voqealar kelgusida takrorlanmasligiga kafolat berishni talab qilgan”.
“Bu Xitoy—Rossiya do‘stligining umumiy ko‘rinishiga va mamlakatlar o‘rtasidagi do‘stona aloqalarning o‘sib borayotgan tendensiyasiga ziddir”, — dedi elchixona.
Rossiya tomoni hozircha voqea yuzasidan izoh bermadi.
Izoh (0)