“Yevropada haydovchilik qilayotgan o‘zbekistonliklarning intizomliligiga guvoh bo‘ldik” — Germaniya hukumati vakili Yoaxim Shtamp

Germaniya Ichki ishlar va vatan vazirligi huzuridagi migratsiya masalalari bo‘yicha hukumat maxsus vakili Yoaxim Shtamp boshchiligidagi delegatsiya “Vatanparvar” tashkilotining Chilonzor tumanidagi o‘quv-sport texnika klubiga tashrif buyurdi. Bu haqda O‘zbekiston Respublikasi mudofaasiga ko‘maklashuvchi “Vatanparvar” tashkiloti matbuot xizmati “Daryo”ga maʼlum qildi.

Aytilishicha, delegatsiya a’zolari avtomototransport haydovchilarini tayyorlash jarayoni bilan tanishgan.

“Maqsad — Germaniyaga haydovchilik bo‘yicha ishga boradigan o‘zbekistonliklarning ushbu kasbga tayyorlanish jarayonini o‘rganish hisoblanadi. Negaki hozirda mamlakatimizda asosan “D” va “E” toifalari bo‘yicha haydovchilarga talab yuqori. Bundan tashqari, Yevropada haydovchilik faoliyati bilan shug‘ullanayotgan o‘zbekistonliklar o‘zlarining anchayin intizomliligi bilan ajralib turishiga guvoh bo‘ldik”, — dedi Yoaxim Shtamp.

Maʼlumot uchun, Yoaxim Shtamp boshchiligidagi delegatsiya Germaniyada ishlash istagini bildirgan o‘zbekistonlik fuqarolarga nemis tilini o‘rgatish, ularni kasb-hunarga o‘qitish bo‘yicha yangi loyihalar ishlab chiqish hamda Germaniyada Tashqi mehnat migratsiyasi agentligi vakolatxonasini ochish bo‘yicha muzokaralar o‘tkazmoqda.

Mavzuga doir:

• O‘zbekiston Germaniya bilan mehnat migratsiyasi bo‘yicha kelishuv tuzadi
• Migratsiya agentligi olti oyda qancha o‘zbekistonlik xorijga ishga joylashtirilganini ma’lum qildi