Germaniya va O‘zbekiston migratsiya tartibini sezilarli darajada osonlashtiradigan migratsiya kelishuvi ustida ishlamoqda. Bu haqda Germaniyaning MiGAZIN nashriga tayanib, “Dunyo” agentligi xabar berdi.
Qayd etilishicha, ishlab chiqilayotgan kelishuv taʼlim va mehnat migratsiyasi sohasidagi hamkorlikni rivojlantirishga qaratilgan. Shuningdek, hujjat o‘zbekistonlik talabalar va ishchilarga Germaniyada o‘qish va ishlash imkonini beradi.
“Migratsiya sohasidagi hamkorlik ham ikki davlat o‘rtasidagi iqtisodiy va madaniy aloqalarni rivojlantirish uchun yangi imkoniyatlar ochmoqda”, — deyiladi xabarda.
O‘zbekistonning Berlindagi elchixonasi maʼlumotlariga ko‘ra, so‘nggi bir yilda 300 ga yaqin o‘zbekistonlik Germaniyada, asosan, dual taʼlim orqali ishga joylashtirilgan. “Kelgusida Germaniyada mehnat qilayotgan O‘zbekiston fuqarolari soni sezilarli darajada oshishi kutilmoqda”, — deya ta’kidlanadi xabarda.
2022-yil dekabrda Rossiyada 200 ming nafar o‘zbekistonlik norasmiy ishlayotgani ma’lum qilingandi. Shuningdek, Bandlik va mehnat munosabatlari vazirligi boshqarma boshlig‘i Zohid Asqarov ayrim firibgarlar chet elga ishlash uchun yuborishini aytib fuqarolardan 6 ming dollargacha pul olayotgani, aldanganlar puldan ham, xorijda ishlashdan ham quruq qolayotganini aytgandi. 2023-yilning aprel o‘rtalarida chet elda ishlamoqchi bo‘lgan O‘zbekiston fuqarolari uchun Germaniya, Isroil, Yaponiya, Rossiya, Latviya, Litva, Bolgariya, Polsha davlatlariga bo‘sh ish o‘rinlari taklif etilayotgani to‘g‘risida xabar berilgandi.
Izoh (0)