Ichki ishlar vaziri Po‘lat Bobojonovdan qayta ishga tiklashini so‘rab, murojaat qilgan sobiq IIB xodimi o‘ziga biriktirilgan bozor hududidagi savdo do‘konlaridan istalgan mahsulotini olib, pulini bermay, bozorchilar eʼtiroziga sabab bo‘lgani va shu sabab ishdan olingani maʼlum qilindi. Bu haqda Ichki ishlar vazirining Bo‘ka tumanidagi “Bo‘ston” mahallasida bo‘lib o‘tgan sayyor qabulida so‘z bordi.
Sayyor qabulga kelgan sobiq IIB xodimi A.B. va uning onasi vazir qabulida bo‘lib, 2021-yildan beri ishsiz ekanini, IIB tizimidan ishdan bo‘shatilgach, muammolarga duch kelayotganini bildirdi.
Mazkur muammoni tinglagan vazir A.B.ning nima sababdan ishdan olingani bilan qiziqdi.
Vazirga maʼlumot bergan IIB mansabdorlarining aytishicha, A.B. Toshkent viloyati Ichki ishlar Bosh boshqarmasi boshlig‘ining 2021-yil 7-maydagi buyrug‘i bilan ishdan bo‘shatilgan.
“Xodim intizomiy jazo chorasi mavjud bo‘lgan taqdirda ham muntazam ravishda xizmat intizomini buzib kelgan. Sobiq xodim Bekobod shahar IIB jamoat tartibini saqlash bo‘linmasi patrul post xizmati guruhi safdor xodimi bo‘la turib, o‘ziga biriktirilgan bozor hududidagi savdo do‘konlaridan muntazam ravishda o‘zi istagan mahsulotlarni olib, savdogarlarga pulini bermay kelgan. Bu esa savdogarlar eʼtiroziga sabab bo‘lgan. Shundan so‘ng bozor rahbariyati bu haqda shikoyat qilgan. Shundan so‘ng xodim xizmat intizomini buzgani va bu holat takroran sodir etilganini inobatga olib, ishdan bo‘shatgan”, — deydi vazirga bu haqda axborot bergan masʼullar.
Vazir mazkur muammoni tinglab bo‘lgach, murojaatchining onasiga yuzlanib, “Ishsiz fuqaroning muammolarga, qiyinchiliklarga duch kelishini bilaman va tushunaman. Ammo jamoat tartibini saqlovchi patrul post xodimi jamoatchilik nazoratidagi vakil bo‘lgani uchun ham bundayin ishlarni qilmasligi, qonunlarni buzmasligi kerak. Har qanday holatda ham qonunni hurmat qilishi lozim”, — dedi.
Vazir qabulida bo‘lgan sobiq IIB xodimining muammosi chuqur o‘rganib chiqilishi, tegishli tartibda javob berilishi maʼlum qilindi.
Izoh (0)