Қашқадарёда бир нафар ИИБ ходими дом-даракcиз йўқолди. У 10 дан ортиқ ҳамкасби билан Сечанкўлга дам олишга чиққан бўлган

Қашқадарё вилоятининг Миришкор туманида жойлашган Сечанкўлда ИИБ ходими йўқолди. Бу ҳақда “Дарё”га маълум қилган манбанинг айтишича, ходим беш кундан бери кўл тагидан қидирилмоқда.

“Дарё” журналисти билан суҳбатлашган Миришкор тумани ҳокимлиги ахборот хизмати раҳбари Азизбек Яздурдиевнинг маълум қилишича, профилактика инспектори ўтган якшанба, 30 июль куни Сечанкўлга дам олишга борган.

Ҳолат жорий йилнинг 30 июлда содир бўлган. “Барҳаёт” МФЙ профилактика инспектори Ж.Э. якшанба, дам олиш куни, ишдан ташқари вақтда шериклари билан Помуқ ҳудудида жойлашган Сечанкўлга дам олиш мақсадида боргани айтилди. Миришкор тумани ИИБ ва ФВБ томонидан қидирув ишлари ташкил этилган бўлиб, Фавқулодда вазиятлар бошқармаси ва туман бўлимининг 15 нафар ходими, махсус техника ва ғаввослари, ИИБ ходимлари қидирув ишларига жалб этилган, — дейди Азизбек Яздурдиев.

ИИБ ходимининг қишлоқдоши эканини айтган суҳбатдошга кўра, 33 ёшли ИИБ ходими кўлга дам олиш учун 10 нафарга яқин ҳамкасблари билан бирга борган.

Воқеа содир бўлган пайтда ўша жойда бўлган ИИБ ходимлари терговда экан. Биз қишлоқдошлари ўша кундан бери кўлга келиб-кетиб, воқеани кузатиб турибмиз. Бугун пайшанба бўлса, ҳали ҳам топилмади, — дейди суҳбатдош.

Суҳбатдошга кўра, капитан Ж.Э.нинг уч нафар фарзанди бор.

Қашқадарё вилояти ИИБ ахборот хизмати раҳбари Ирода Расулова қидирув ишлари давом этаётганини, воқеа вилоят прокуратураси назоратида эканини айтиб, бундан ортиқ маълумот беролмаслигини билдирди. Вилоят прокуратураси эса ҳолат ҳақида тез орада батафсил маълумот берилишини маълум қилди.