O‘zbekistonda maktab o‘qituvchilari va bog‘cha tarbiyachilarining ish haqi ikki barobarga oshirilishi kutilmoqda

O‘zbekistonda maktabgacha va umumiy o‘rta ta’lim muassasalari pedagog xodimlarining ish haqini ikki barobar oshirish rejalashtirilmoqda. Bu haqda jamoatchilik muhokamasi uchun e’lon qilingan “O‘zbekiston—2030” strategiyasi loyihasida ko‘zda tutilgan.

Loyihada ta’lim tizimi islohotlari keltirilgan bo‘lib, pedagog kadrlar maqomini oshirish, ularning bilimi va malakasini xalqaro standartlarga muvofiqlashtirish maqsadida ming nafar tarbiyachi va o‘qituvchini xorijiy mamlakatlarga malaka oshirish va stajirovkaga yuborish ko‘zda tutilmoqda. 500 ming nafar maktabgacha va umumiy o‘rta ta’lim tashkilotlari xodimlarining malakasi uzluksiz oshiriladi.

Maktabgacha ta’lim tizimini yangi bosqichga olib chiqish hamda bolalarning to‘liq qamrovini ta’minlash maqsad qilingan. Bolalarni maktabgacha ta’lim va tayyorlov guruhlari bilan qamrov darajasini 100 foizga yetkazish, nodavlat maktabgacha ta’lim tashkilotlari sonini 56 mingtaga yetkazish, 2 mingta bog‘cha tashkil qilish rejalashtirilmoqda. Barcha davlat maktabgacha ta’lim tashkilotlarini kompyuter sinfi bilan ta’minlandi.

Umumiy o‘rta ta’lim tizimida 2023/2024-o‘quv yilidan boshlab har yili 500 ming yangi quvvatlarni tashkil etib borish, o‘quv o‘rinlari sonini 7,5 milliongacha yetkazish rejalashtirilmoqda. Loyihaga ko‘ra, 2,5 million o‘quvchi o‘rniga ega maktablar qurishga 8 milliard dollar ajratiladi. 699 nomdagi yangi darsliklar, mashq daftarlari, o‘qituvchi metodika kitoblari va mobil ilovalar yaratiladi. 208 ta “Iste’dod – Intilish – Istiqbol” nomli maktab-internatlar tashkil etiladi.

Ta’lim tashkilotlariga har yili 500 nafar til egalari bo‘lgan xorijiy mutaxassislar jalb etiladi.

Boshlang‘ich sinf o‘qituvchilarining o‘quv yuklamasi 16 soat, yuqori sinf o‘qituvchilariga esa 18 soat etib belgilanadi. Olis va chekka hududlarda joylashgan 715 ta umumiy o‘rta ta’lim muassasalari o‘quvchilari uchun bepul maktab avtobuslari yo‘lga qo‘yiladi.

Bundan tashqari, maktabgacha ta’lim tashkilotlari va umumiy o‘rta ta’lim muassasalarini toza ichimlik suvi va zamonaviy sanitariya-gigiyena infratuzilmasi bilan to‘liq ta’minlash ko‘zda tutilmoqda.