Ўзбекистонда мактабгача ва умумий ўрта таълим муассасалари педагог ходимларининг иш ҳақини икки баробар ошириш режалаштирилмоқда. Бу ҳақда жамоатчилик муҳокамаси учун эълон қилинган “Ўзбекистон—2030” стратегияси лойиҳасида кўзда тутилган.
Лойиҳада таълим тизими ислоҳотлари келтирилган бўлиб, педагог кадрлар мақомини ошириш, уларнинг билими ва малакасини халқаро стандартларга мувофиқлаштириш мақсадида минг нафар тарбиячи ва ўқитувчини хорижий мамлакатларга малака ошириш ва стажировкага юбориш кўзда тутилмоқда. 500 минг нафар мактабгача ва умумий ўрта таълим ташкилотлари ходимларининг малакаси узлуксиз оширилади.
Мактабгача таълим тизимини янги босқичга олиб чиқиш ҳамда болаларнинг тўлиқ қамровини таъминлаш мақсад қилинган. Болаларни мактабгача таълим ва тайёрлов гуруҳлари билан қамров даражасини 100 фоизга етказиш, нодавлат мактабгача таълим ташкилотлари сонини 56 мингтага етказиш, 2 мингта боғча ташкил қилиш режалаштирилмоқда. Барча давлат мактабгача таълим ташкилотларини компьютер синфи билан таъминланди.
Умумий ўрта таълим тизимида 2023/2024-ўқув йилидан бошлаб ҳар йили 500 минг янги қувватларни ташкил этиб бориш, ўқув ўринлари сонини 7,5 миллионгача етказиш режалаштирилмоқда. Лойиҳага кўра, 2,5 миллион ўқувчи ўрнига эга мактаблар қуришга 8 миллиард доллар ажратилади. 699 номдаги янги дарсликлар, машқ дафтарлари, ўқитувчи методика китоблари ва мобил иловалар яратилади. 208 та “Истеъдод – Интилиш – Истиқбол” номли мактаб-интернатлар ташкил этилади.
Таълим ташкилотларига ҳар йили 500 нафар тил эгалари бўлган хорижий мутахассислар жалб этилади.
Бошланғич синф ўқитувчиларининг ўқув юкламаси 16 соат, юқори синф ўқитувчиларига эса 18 соат этиб белгиланади. Олис ва чекка ҳудудларда жойлашган 715 та умумий ўрта таълим муассасалари ўқувчилари учун бепул мактаб автобуслари йўлга қўйилади.
Бундан ташқари, мактабгача таълим ташкилотлари ва умумий ўрта таълим муассасаларини тоза ичимлик суви ва замонавий санитария-гигиена инфратузилмаси билан тўлиқ таъминлаш кўзда тутилмоқда.
Изоҳ (1)
Oylik degan joyi yoqku