Maktab o‘qituvchilari va tarbiyachilar oyligi nega pastligi aytildi

Statistika agentligi eʼlon qilgan axborotda 2023-yilning yanvar–iyun oylarida taʼlim o‘rtacha oylik ish haqi eng kam to‘lanadigan sohalar qatoridani o‘rin olgan. Xususan, umumiy o‘rta taʼlim maktablari o‘qituvchilari 3 million so‘mdan, maktabgacha taʼlim tarbiyachilari 1,6 million so‘mdan o‘rtacha oylik ish haqi olgan.

Kecha, 31-iyul kuni AOKAda o‘tkazilgan matbuot anjumanida maktabgacha va maktab taʼlimi vazirining birinchi o‘rinbosari Usmon Sharifxo‘jayev sohada oyliklar nega kamligining ayrim sabablarini ochiqladi, deya xabar berdi “Daryo” muxbiri.

Usmon Sharifxo‘jayevning taʼkidlashicha, o‘qituvchilarning oyligini yuqori darajaga ko‘tarish uchun davlat budjetining imkoniyati yetmaydi.

“Bunga juda ko‘p sabablar bor. Ammo imkon boricha tizimda ishlayotgan xodimlarga yuqori oylik olish uchun sharoit yaratib berilmoqda. Yaʼni o‘qituvchi turli taʼlim sertifikatlariga ega bo‘lsa, oyligini ko‘tara oladi. Lekin bir vaqtning o‘zida barcha o‘qituvchilarning oyligini oshirish uchun davlat budjetida imkoniyat yo‘q.

Agar oyliklarga 1 million so‘mdan qo‘shilsa ham, statistikadagi o‘rinlarda juda yuqori ko‘tarila olmaymiz. Lekin faqat maktab o‘qituvchilari oyligiga 1 million so‘m qo‘shish, budjetga yiliga qo‘shimcha 5 trillion so‘m xarajat bo‘ladi degani. Hozir bizning tizimga ajratilayotgan mablag‘ miqdori salkam 30 trillion so‘m.

Albatta, eng yaxshi ustozlar uchun imkoniyatlar oshirilmoqda. Ammo oyliklarni ommaviy oshirish uchun iqitisodiyot yanada rivojlanishi, soliq to‘lovchilar vaqtida, to‘liqligicha soliqlarini to‘lashi kerak bo‘ladi”, — dedi vazir o‘rinbosari.

Qo‘shimcha qilinishicha, bog‘cha sohasida tabaqalashtirilgan tizimni yo‘lga qo‘yish ishlari ketmoqda. Ayni paytda O‘zbekistondagi bog‘chalarda oliy maʼlumotli tarbiyachilarning umumiy ulushi 34 foizni tashkil etadi. Ularning oyligi 2024-yil 1-iyundan boshlab maktab o‘qituvchilari oyligiga tenglashtiriladi.

• Ayni paytda O‘zbekistonda 10 ming 296 ta maktab va 29 ming 420 ta bog‘cha mavjud bo‘lib, jami 8 million nafarga yaqin o‘quvchi va tarbiyalanuvchilar qamrab olingan.
• Ularga 700 ming nafar pedagoglar taʼlim va tarbiya berib kelmoqda.
• Kuzda boshlanadigan yangi o‘quv yili uchun maktablarga jami 732 ming nafar bola qabul qilish rejalashtirilgan.