Farg‘onada karaoke kafesida sodir bo‘lgan yong‘indan so‘ng yerto‘lalardagi yong‘in xavfsizligi tekshiriladi

Farg‘ona shahrida joylashgan karaoke kafesida yuz bergan yong‘in oqibatida 6 nafar fuqaro halok bo‘lgani to‘g‘risida xabar berilgandi. FVB matbuot xizmati bunday baxtsiz hodisalarning oldini olish hamda kamchiliklarni aniqlash yuzasidan ishchi guruh hamda shtab tashkil qilinganini bildirdi.

Qayd etilishicha, 29-iyul kuni viloyat Favqulodda vaziyatlar boshqarmasi binosida viloyat ishchi guruhi hamda shtab tashkil qilindi. Tashkil etilgan ishchi guruh tomonidan o‘sha kunning o‘zida ushbu 25 ta tuzilgan ishchi guruhning har biriga 11 nafardan mutaxassislar biriktirildi va Farg‘ona shahridagi 73 ta mahalla fuqarolar yig‘inlari hududidagi ko‘p qavatli turar joy binolarining yerto‘la qismida tadbirkorlar tomonidan tashkil etilgan  savdo va maishiy xizmat ko‘rsatish  shoxobchalari, o‘quv markazlari, ko‘ngilochar servis shoxobchalarining yong‘in xavfsizligi va sanitariya holatini xatlovdan o‘tkazish vazifasi belgilab olindi.

Farg‘ona shahar “Mashʼal” MFY Sayilgoh ko‘chasidagi to‘rt qavatli binoning yerto‘lasida joylashgan karaoke kafesida yong‘in 29-iyul kuni sodir bo‘lgandi. Voqea joyiga 6 ta yong‘in-qutqaruv ekipaji 11:44 da yetib borib, yong‘in soat 11:48 da qurshab olinib, soat 11:56 da to‘liq bartaraf etilgandi.

Hodisa oqibatida 6 nafar fuqaro halok bo‘lgan, 7 nafar fuqaro turli darajadagi tan jarohatlari bilan shifoxonaga yuborilgan.

Prezident topshirig‘iga asosan sodir bo‘lgan voqeani o‘rganish va jabrlanganlarga yordam ko‘rsatish maqsadida bosh vazir o‘rinbosari Ochilboy Ramatov boshchiligida hukumat komissiyasi tuzilgan. O‘rganish ishlari davomida, dastlabki ma’lumotlarga ko‘ra, 6 nafar fuqaro yong‘indan chiqqan tutundan zaharlanish oqibatida halok bo‘lgan. Sud-tibbiy ekspertizasining dastlabki xulosasi ham shunday.

Komissiya baxtsiz hodisa oqibatida vafot etganlarning oila a’zolariga hamda jabrlanganlarga tibbiy, moddiy, psixologik va boshqa yordamlar ko‘rsatilishini ham ta’minlaydi.

Ayni paytda holat yuzasidan Farg‘ona viloyati prokuraturasi tomonidan jinoyat ishi qo‘zg‘atilgan va tergov harakatlari olib borilmoqda.