Avvalroq Farg‘ona shahrida joylashgan karaokeda yuz bergan yong‘in oqibatida 6 nafar fuqaro halok bo‘lgani haqida xabar berilgandi. Bosh vazir o‘rinbosari Ochilboy Ramatov boshchiligida hukumat komissiyasi Farg‘ona shahriga yetib borib, o‘rganish ishlarini olib bordi, deya xabar berdi Favqulodda vaziyatlar vazirligi.
“O‘rganish ishlari davomida dastlabki ma’lumotlarga ko‘ra, 6 nafar fuqaro yong‘indan chiqqan tutundan zaharlanish oqibatida halok bo‘lgan. Sud-tibbiy ekspertizaning dastlabki xulosasi ham shunday. Hukumat komissiyasining ishi davom etmoqda. Hodisa yuzasidan qo‘shimcha ma’lumot taqdim etiladi”, — deyiladi xabarda.
Prezident topshirig‘iga ko‘ra, hukumat komissiyasi tuzilgan. Qayd etilishicha, jabrlanganlarga SSV Respublika shoshilinch tibbiy yordam ilmiy markazi Farg‘ona viloyati filialida zarur tibbiy yordam ko‘rsatilmoqda. Holat yuzasidan Farg‘ona viloyati prokuraturasi tomonidan jinoyat ishi qo‘zg‘atilgan va tergov harakatlari olib borilmoqda.
Komissiya o‘z faoliyatini yong‘in va texnika xavfsizligi, shuningdek, baxtsiz hodisalarni tekshirish va hisobga olish to‘g‘risidagi qonunchilik hujatlari talablariga muvofiq tashkil etadi.
Komissiya bir hafta muddatda:
- Baxtsiz hodisa oqibatida vafot etganlarning oila a’zolariga hamda jabrlanganlarga tibbiy, moddiy, psixologik va boshqa yordamlar ko‘rsatilishini ta’minlaydi.
- Shuningdek, komissiya obyektda baxtsiz hodisa kelib chiqishiga olib kelishi mumkin bo‘lgan omillarni har tomonlama o‘rganib chiqadi.
- Tekshirish yakunlari bo‘yicha tegishli dalolatnomalar rasmiylashtirilib, jabrlanganlarga ko‘rsatilgan yordamlar bo‘yicha hisobot Vazirlar Mahkamasiga kiritiladi.
Izoh (0)