Футбол бўйича Ўзбекистон Суперлигасининг 14-турида “Пахтакор” ва “Олимпик” жамоалари ўзаро тўқнаш келди. Учрашувда 2:0 ҳисобида “шерлар”нинг қўли баланд келди. Ўйиндан кейинги матбуот анжуманида иккала жамоа мураббийлари ўз фикрларини баён этди.
Бугун жисмонан чарчаб қолмаслик керак эди. Жамоанинг жисмоний ҳолатидан кўнглим тўқ. Шунчаки, тактик жиҳатдан ҳам яхшироқ ўйнашимизни истагандик. Буни уддаладик. Рақибдан анча кескинроқ ўйнадик ва ҳаққоний ғалабага эришдик.
Ҳамралиев билан гаплашиб олдик. У жуда яхши футболчи. Ақлли ва келажаги бор ўйинчи. Бу ёшда бундай хатолар қилиши табиий. Хаёлидаги негатив нарсаларни чиқариб ташлашини маслаҳат бердим.
Трансфер ойнасида ўзимиз истаган футболчиларни олдик дея оламан. Энди оладиган бўлсак, фақат маҳаллий футболчилардан оламиз. Легионерлар учун лимитимиз тугади.
Аббос Файзуллаевнинг жамоадан кетиши кутилмаган жараён эмас. Буни кутгандик. У билан бунгача гаплашдик. Аммо, кетиши бу унинг танлови. Унга фақат омад тилайман.
Жамоанинг барча чизиғида рақобат бор дея оламан. Янги олиб келган дарвозабонимизнинг ҳаракатлари мени анча қувонтираяпти. Бу Қувватовга ҳам етарли мотивация. Умуман олганда, бошқа чизиқларда ҳам рақобат етарли.
Максим Шацких, “Пахтакор” бош мураббийи
“Олимпик” устози Тимур Кападзе ҳам учрашув борасида ўз фикрларини билдириб ўтди.
Қизиқарли баҳс бўлди. Бугун йигитлар футбол ўйнашга ҳаракат қилди. Афсуски, “Пахтакор” футболчилари тезкор голдан сўнг вақт чўзишга ҳаракат қилишди. “Шерлар” бундай таркиби билан яхшиси, футбол ўйнаса бўларди. Тўхталишлар жуда ҳам кўп бўлди. Биз бугун футбол ўйнамоқчи эдик. Меҳмонлар эса шундай усул билан темпни бузишга ҳаракат қилди. Ўзимизнинг хатолар сабаб иккита тўп олиб чиқдик. Иккала вазиятда ҳам ҳужумни бартараф этишнинг имкони бор эди.
“Пахтакор” Холдорхоновни бизга беришни истамаяпти. Ўйлашимча, клуб уни қўйиб юборганида яхши бўлар эди. Боиси, “шерлар”нинг ҳужум чизиғида футболчилар етарлича ва қанча ўйин амалиётига эга бўлишини вақт кўрсатади. Унинг нималарга қодир эканлигини биламиз. Шу сабаб у бизнинг жамоада ҳаракат қилганида кўпроқ ўйнаган бўлар эди. Футболчини терма жамоага тайёрлашда ўйин амалиёти муҳим саналади.
Мен учун футболчиларнинг ўйин амалиётига эга бўлиши муҳим. Улар термага тонусда келишлари лозим. Масалан, ҳозир Норчаевдан хавотирдаман. У жуда ҳам кам майдонга тушмоқда. Термага чақирилганда формада эмаслигига гувоҳ бўлдим.
Жўрақўзиев келгуси учрашувда ҳам майдонга тушмаслиги мумкин. Икки-уч кундан сўнг машғулотларни бошлайди. Унинг ҳам йўқлиги катта йўқотиш.
Тимур Кападзе, “Олимпик” бош мураббийи
Изоҳ (0)