O‘zbekistonda milliy valyutadagi kreditlar bo‘yicha o‘rtacha foiz stavkalari so‘nggi bir necha choraklarda yillik 22-23 foiz atrofida muvozanatlashgan. Bu haqda Markaziy bank eʼlon qilgan “Pul-kredit siyosati sharhi”da yozilgan.
Maʼlum qilinishicha, joriy yilning 2-choragi davomida so‘mdagi kreditlar bo‘yicha foiz stavkalari 22-23 foiz oralig‘ida shakllandi.
“Xususan, iyun oyida milliy valyutadagi qisqa muddatli kreditlar bo‘yicha o‘rtacha tortilgan foiz stavkalari 22,3 foizni va uzoq muddatli kreditlar bo‘yicha 22,7 foizni tashkil etdi. O‘z navbatida, iyun oyida jismoniy va yuridik shaxslarning milliy valyutadagi kreditlari bo‘yicha o‘rtacha tortilgan foiz stavkalari mos ravishda 23,4 va 21,7 foizga teng bo‘ldi”,— deyiladi sharhda.
Markaziy bankka ko‘ra, milliy valyutadagi kreditlar bo‘yicha o‘rtacha foiz stavkalari so‘nggi bir necha choraklarda yillik 22-23 foiz atrofida muvozanatlashgan. Bu kelgusida inflyatsiya darajasining kutilayotgan pasayishiga mos ravishda Markaziy bank asosiy stavkasining ham pasaytirilishi kreditlar bo‘yicha foiz stavkalarining pasayishiga xizmat qiladi.
Iqtisodiyotga 2023-yil II chorakda tijorat banklari tomonidan jami 62,1 trln so‘mlik kreditlar ajratilgan bo‘lib, I chorakka nisbatan 15,8 foizga (8,5 trillion so‘mga) va 2022-yilning mos davriga nisbatan 25,4 foizga (12,6 trillion so‘mga) ko‘p bo‘ldi. Bunda, jismoniy shaxslarga ajratilgan kreditlar 1,7 barobarga ko‘paygan bo‘lib, aholiga ajratilayotgan avtokreditlar, ipoteka kreditlari va mikroqarzlar nisbatan yuqori ulushga ega bo‘lgan.
2023-yil 1-iyul holatiga iqtisodiyotga kredit qo‘yilmalarining yillik o‘sishi 25,1 foizni tashkil etgan bo‘lsa, shundan aholiga ajratilgan kreditlar yillik o‘sishi 54 foizga teng bo‘ldi. Chakana kreditlarning o‘sish surʼatlari aholining kreditlarga bo‘lgan yuqori talabi bilan izohlanadi.
Izoh (1)
Bomagan gap qayerdan oldina bu informatsiyani? Eng kam foiz 28% eng kop foiz 60%