Ўзбекистонда миллий валютадаги кредитлар бўйича ўртача фоиз ставкалари сўнгги бир неча чоракларда йиллик 22-23 фоиз атрофида мувозанатлашган. Бу ҳақда Марказий банк эълон қилган “Пул-кредит сиёсати шарҳи”да ёзилган.
Маълум қилинишича, жорий йилнинг 2-чораги давомида сўмдаги кредитлар бўйича фоиз ставкалари 22-23 фоиз оралиғида шаклланди.
“Хусусан, июнь ойида миллий валютадаги қисқа муддатли кредитлар бўйича ўртача тортилган фоиз ставкалари 22,3 фоизни ва узоқ муддатли кредитлар бўйича 22,7 фоизни ташкил этди. Ўз навбатида, июнь ойида жисмоний ва юридик шахсларнинг миллий валютадаги кредитлари бўйича ўртача тортилган фоиз ставкалари мос равишда 23,4 ва 21,7 фоизга тенг бўлди”,— дейилади шарҳда.
Марказий банкка кўра, миллий валютадаги кредитлар бўйича ўртача фоиз ставкалари сўнгги бир неча чоракларда йиллик 22-23 фоиз атрофида мувозанатлашган. Бу келгусида инфляция даражасининг кутилаётган пасайишига мос равишда Марказий банк асосий ставкасининг ҳам пасайтирилиши кредитлар бўйича фоиз ставкаларининг пасайишига хизмат қилади.
Иқтисодиётга 2023 йил II чоракда тижорат банклари томонидан жами 62,1 трлн сўмлик кредитлар ажратилган бўлиб, I чоракка нисбатан 15,8 фоизга (8,5 триллион сўмга) ва 2022 йилнинг мос даврига нисбатан 25,4 фоизга (12,6 триллион сўмга) кўп бўлди. Бунда, жисмоний шахсларга ажратилган кредитлар 1,7 баробарга кўпайган бўлиб, аҳолига ажратилаётган автокредитлар, ипотека кредитлари ва микроқарзлар нисбатан юқори улушга эга бўлган.
2023 йил 1 июль ҳолатига иқтисодиётга кредит қўйилмаларининг йиллик ўсиши 25,1 фоизни ташкил этган бўлса, шундан аҳолига ажратилган кредитлар йиллик ўсиши 54 фоизга тенг бўлди. Чакана кредитларнинг ўсиш суръатлари аҳолининг кредитларга бўлган юқори талаби билан изоҳланади.
Изоҳ (1)
Bomagan gap qayerdan oldina bu informatsiyani? Eng kam foiz 28% eng kop foiz 60%