Aktrisa Neha Dhupiya Hindistonning eng go‘zal qizlaridan biri sifatida tan olindi, 2002-yilda “Hindiston go‘zali” mukofotini qo‘lga kiritdi va “Koinot go‘zali” tanlovida finalchilar qatoriga kirdi.
Neha Dhupiya 1980-yilning 27-avgust sanasida Keralaning eng yirik shaharlaridan biri — Kochinda tug‘ilgan. Uning otasi, qo‘mondon Pradip Singh Dhupiya Hindiston dengiz flotida xizmat qilgan, onasi esa uy yumushlari bilan shug‘ullangan, shuningdek, Neha va uning ukasi Xardipni tarbiyalagan.
Aktrisa a’lochilar qatorida bo‘lgan va keyinchalik harbiy maktabda tahsil olgan. Nehaning ota-onasi qizining davlat xizmatiga kirishishiga ishongan, biroq uning taqdiri umuman boshqacha kechdi.
U bolaligida ham malayalamcha “Mayoq” filmida kichkina qizaloq rolini o‘ynagan va talabalik yillarida modellik sohasiga qiziqib qolgan. Neha go‘zallik tanlovlari sahnasiga chiqishdan oldin teatrda bir nechta spektakllarda rol ijro etdi. Aktrisa sahnaga chiqishni juda yaxshi ko‘rardi, aynan shu yerda uni “Hindiston go‘zali” tanlovi tashkilotchilari payqab qolishdi.
Dhupiya 2002-yilda Hindistondagi eng go‘zal ayoli sifatida tan olindi va Puerto-Rikoda bo‘lib o‘tishi rejalashtirilgan “Koinot go‘zali—2002” tanloviga yo‘l oldi. Aktrisa u yerda Hindiston nomini munosib tarzda himoya qildi va eng yaxshi o‘n nafar finalchi qatoriga kiritildi.
U “Hindiston go‘zali” tanlovida ishtirok etgandan so‘ng, kutilganidek, ijodkorlar aktrisani rollarga taklif qila boshladi. Neha taklidlarni rad etmadi va oradan ko‘p o‘tmay Bollivudda “Hayotga qaytish” trillerida debyut qildi, ushbu loyihada bosh rollarni Ajay Devgan va Sunil Shetti ijro etgan.
Keyinchalik aktrisa “Sirli aloqa” loyihasida suratga tushdi va unda egizak opa-singillarning rolini o‘ynadi, ammo bu film kassada muvaffaqiyat qozonmadi. Oradan vaqt o‘tib u “Biz qanday ajoyibmiz” komediyasida rol ijro etdi va shundan keyin Nehaga dadil aktrisa deb ta’rif berildi.
U “Xatolar komediyasi”, “Lokandvaladagi otishma”, “Qirol Singh”, “Ko‘rishguncha” loyihalarida ikkinchi darajali rolni ijro etdi. Neha 2011-yilda “Gitlerning qadrdon do‘sti” filmida Eva Braun rolini o‘ynadi va 2016-yilda u Bollivudda “Neha bilan filtrsiz” nomli podkastini yaratdi. U podkastida Bollivuddagi mashhur insonlardan intervyu olgan. Shou ijobiy baholarga sazovor bo‘ldi va tomoshabinlar uning yangi sonlarni intiqlik bilan kutishmoqda.
Aktrisa o‘z baxtini boshqa hamkasblariga qaraganda ancha kech topdi. Neha uzoq vaqt davomida skvosh o‘yinchisi Ritvik Bhattacharya bilan munosabatda bo‘lgan. Biroq shunga qaramay, ular turmush qurishmadi va 2010-yilda juftlikning taqdir yo‘li ikkiga bo‘lindi.
Keyinchalik Neha tish shifokori Jeyms Silvestr bilan ishqiy munosabatda bo‘ldi. Bu munosabatlar uch yil davom etdi va ajralish bilan yakunlandi. 2014-yilda Dxupiya kriketchi Yuvraj Singh bilan uchrasha boshladi, ammo bu munosabatlar ham uzoqqa bormadi.
2018-yilning 10-may kuni 37 yoshli aktrisaning kutilmaganda aktyor Angad Bediga turmushga chiqqani ma’lum bo‘ldi. Bu voqea ko‘pchilikni hayratda qoldirdi, chunki o‘sha paytda Angad raqqosa Nora Fatexi bilan munosabatda edi. To‘y yashirincha o‘tkazildi.
Ko‘p o‘tmay ularning qizi Mehr, uch yildan so‘ng esa o‘g‘li Gurik dunyoga keldi. Aktrisa o‘tgan yili ekranlarga chiqqan “Payshanba” trillerida Yami Gautam rolini o‘ynaganida homiladorligining so‘nggi oylarida bo‘lgan. Film sujetiga ko‘ra, uning qahramoni politsiyachi Ketrin Alvares ham farzand kutayotgan edi.
Hozirda Neha ko‘proq vaqtini oilasi bilan o‘tkazmoqda, biroq u Instagram’da faol va reklama roliklarida rol o‘ynaydi.
Izoh (0)