“Shri-Lanka go‘zali” Jaklin Fernandes qanday qilib Bollivudda muvaffaqiyatga erishdi? (foto)

Hindistonlik bo‘lmasa-da, Bollivudda o‘z o‘rniga ega bo‘lgan aktrisa Jaklin Fernandes muvaffaqiyatga erishguniga qadar ko‘p qiyinchiliklarni yengib o‘tgan. Quyida aktrisaning shaxsiy hayoti va faoliyati haqida ma’lumot beriladi.

Jaklin Fernandes 1985-yilning 11-avgust sanasida Bahraynda ko‘p millatli oilada tug‘ilgan. Uning otasi Elroy Shri-Lankadan, onasi Kimda esa malayziyalik va kanadaliklarning qoni bor. Oila a’zolari tomonidan Jeki deb atalgan Jaklin to‘rt farzandning eng kichigi edi. Uning opasi va ikkita akasi bor.

Aktrisaning so‘zlariga ko‘ra, u bolaligidan Gollivud kino yulduzi bo‘lishni orzu qilgan va hatto aktyorlik maktabini tugatgan. U Sidneyga oliy ma’lumotli bo‘lish uchun borgan va u yerda jurnalistika, ommaviy kommunikatsiyalar sohasi bo‘yicha tahsil olgan. Jaklin Kolomboda telejurnalist bo‘lib ishlayotgan paytda unga “Shri-Lanka go‘zali” tanlovida ishtirok etishni taklif qilishgan.

U loyihada muvaffaqiyatni qo‘lga kiritdi va Los-Anjelesda bo‘lib o‘tgan “Koinot go‘zali-2006” tanlovida Shri-Lanka nomini himoya qildi. Afsuski, u top-20 talikka kira olmadi, biroq moda sanoati vakillari 20 yoshli go‘zalga e’tibor qaratdi va shundan keyin u modellik karyerasini kino olami bilan muvaffaqiyatli birlashtirdi.

Jaklin 2009-yilda o‘z agentligining ko‘rsatmasi bilan birinchi marta Hindistonga bordi. Aktrisa u yerda faqat qiziqish tufayli Sujoy Ghoshning “Olovuddin” komedik-fantastik filmi uchun kastingga bordi va hind tilida zo‘rg‘a gapirsa ham, malika Jasmin rolini ijro etdi.

Film kassada muvaffaqiyatsizlikka uchradi. Ba’zi tanqidchilar aktrisani tanqid qilishdi va unga kino sanoatiga aralashmaslikni maslahat berdi. Boshqalar uning ajoyib ko‘rinishi va jozibasiga e’tibor qaratdi. Qanday qilib bo‘lmasin, Jaklin o‘z roli tufayli “Eng yaxshi aktrisalik debyuti” nominatsiyasida IIFA mukofotiga sazovor bo‘ldi.

Fernandes har doim yuqori maqsadlar va istaklarga ega qiz bo‘lgan, shuning uchun u birinchi muvaffaqiyatsizlikdan umuman xafa bo‘lmadi va unga taklif qilingan rollarga zavq bilan rozilik bera boshladi. Mahesh Bhattning “Qotillik-2” trilleri aktrisaning birinchi tijorat muvaffaqiyati va karyerasidagi burilish nuqtasi bo‘ldi.

Jaklin “Qotillik-2” (2011-yil), “Uy-2” (2012-yil) va “Poyga-2” (2012-yilda suratga olingan) filmlarida ajoyib xet-trik qayd etdi, shundan so‘ng u “Sikvellar qirolichasi” unvonini oldi.

Keyinroq Salmon Xon uni shogirdlikka oldi va ular birgalikda “Zarba” (2014-yilda namoyish etilgan) blokbasterida ishtirok etdi, bu loyihadagi rol Jekini Bollivudning eng mashhur aktrisalaridan biriga aylantirdi.

U ko‘pincha mashhur qahramonlar ishtirokidagi katta budjetli, qo‘shiqlar va raqslari ko‘p bo‘lgan yoshlarga qaratilgan filmlarni tanladi. Uning raqslari YouTube’da doimiy ravishda bir necha million marta ko‘rilmoqda.

Biroq aktrisa 2020-yilda bergan intervyularining birida quvnoq va yuzaki qahramonlar rolini o‘ynashdan charchaganini ochiqchasiga tan oldi.

“Men noma’lum va murakkab narsani sinab ko‘rmoqchi edim. ‘Qotil ayol’ trilleri filmografiyamda aynan shunday paydo bo‘ldi”, — deydi Jaklin.

Hozirda Jaklin hayotidagi eng yaxshi lahzalarni yashamayapti, u 200 million dollar miqdoridagi pulga tovlamachilik yo‘li bilan ega chiqqanlik aybi bilan tergov qilinmoqda. Xabarlarga ko‘ra, aktrisa firibgar Sukesh Chandrashekharning firibgarlik va tovlamachilik yo‘li bilan qo‘lga kiritgan millionlab pullaridan “foyda oluvchi” hisoblanadi. Sukesh Jaklinga 900 ming rupiylik mushuk yoki 5 million rupiylik ot kabi qimmatbaho sovg‘alar bergan.

Aytishlaricha, u turmush qurgan Chandrashekharning sevgilisi bo‘lgan, biroq aktrisa buni rad etadi. O‘tmishda u Bahrayn shahzodasi Hasan bin Rashid Al Xalifa, shuningdek, “Uy” va “Uy-2” filmlarida birga ishlagan rejissor Sojid Xon bilan munosabatda bo‘lgan. Juftlik uch yildan ko‘proq vaqt davomida uchrashgan, biroq shunga qaramay munosabatlarga nuqta qo‘yilgan va ularning taqdir yo‘llari birlashmagan. Jaklin turmushga chiqmagan.

Albatta, bu voqealardan keyin uning obro‘siga putur yetdi va katta miqdordagi pul bilan bog‘liq firibgarlik ishi sababli bir nechta loyiha mualliflari aktrisa bilan shartnomani bekor qildi. Biroq Jaklinga Akshay Kumar yordam berdi va unga “Bachchan Pandey”, “Ram Setu” va “Selfi” loyihalaridan rol berdi.