O‘zbekiston xalq artisti Farrux Zokirov jurnalist Nasiba Faxritdinovaning “Tet-a-tet” loyihasiga bergan intervyusida bir nechta mamlakat prezidentlaridan qimmatbaho sovg‘alar, xususan, tilla soatlar olgani haqida so‘zlab berdi.
— 1994—95-yillar edi. To‘rt mamlakat prezidentlari oldida kuyladim. Sahnada Islom Abdug‘aniyevich bilan Turkmaniston prezidentining menga qarab gaplashishayotganiga ko‘zim tushdi. Bir mahal ular ikkalasi ham o‘rnidan turib, men tomonga yura boshladi. Darhol ichimdan: “Hozir mendan turkman tilida qo‘shig‘ing bormi?” deb so‘rashadi, degan o‘y o‘tdi. Shokda va hayajondaman. Repertuarimda turkman tilidagi qo‘shiq yo‘q edi. Prezidentlar tobora sahnaga yaqin kela boshladi. O‘rtamizda 5 metrcha masofa qolganida turkmanboshi bir qo‘lini tepaga ko‘tarib, soatini yechdi va kelib, meni quchoqladi. Men esa hamon shokdaman. U qulog‘imga “Biz sizni judayam hurmat qilamiz”, dedi va soatni menga uzatdi. Soat anchagina og‘ir, taxminan, yarim kilo tilladan yasalgan edi. Judayam chiroyli ishlangan soat, uni haligacha taqaman, — deydi Farrux Zokirov.
Farrux Zokirovning aytishicha, davlat rahbarlari tomonidan taqdim etilgan sovg‘alar unda talaygina.
— Afg’onistonda ham shunga o‘xshash holat yuz bergan. 16-aprel — tug‘ilgan kunimda prezidentlar oldida chiqish qilganman. Shunda Afg‘onistonning o‘sha paytdagi prezidenti Muhammad Najibulla sahnaga chiqib, “Ozgina ruscha gapira olaman, tug‘ilgan kuningiz bilan tabriklayman”, degan va qo‘limga qandaydir qutini tutqazgan. Davlat rahbaridan sovg‘a olish, albatta, hayajonli va sharafli. Qo‘shiq kuylab bo‘lib, sovg‘aning nima ekanligiga qiziqib, qutini ochsam, u yerda tilla soat bor ekan. Oradan vaqt o‘tdi. O‘g‘lim o‘sha soatni taqib tursam maylimi, deb so‘radi. Rozilik bildirdim. Bir payt u “Dada, soat qo‘limdan yerga tushib ketdi va chilparchin bo‘ldi”, deb qoldi. Men o‘zim ham soatlarimni ko‘pincha qo‘limdan tushirib yuborardim, biroq hech qachon bunaqa chilparchin bo‘lib ketmagan. O‘sha kuni esa biz Afg‘onistonda fojia yuz bergani hamda menga soat sovg‘a qilgan prezident o‘ldirilgani haqida xabar topdik, — deydi Farrux Zokirov.
Izoh (0)