Ҳиндистонлик бўлмаса-да, Болливудда ўз ўрнига эга бўлган актриса Жаклин Фернандес муваффақиятга эришгунига қадар кўп қийинчиликларни енгиб ўтган. Қуйида актрисанинг шахсий ҳаёти ва фаолияти ҳақида маълумот берилади.
Жаклин Фернандес 1985 йилнинг 11 август санасида Баҳрайнда кўп миллатли оилада туғилган. Унинг отаси Элрой Шри-Ланкадан, онаси Кимда эса малайзиялик ва канадаликларнинг қони бор. Оила аъзолари томонидан Жеки деб аталган Жаклин тўрт фарзанднинг энг кичиги эди. Унинг опаси ва иккита акаси бор.
Актрисанинг сўзларига кўра, у болалигидан Голливуд кино юлдузи бўлишни орзу қилган ва ҳатто актёрлик мактабини тугатган. У Сиднейга олий маълумотли бўлиш учун борган ва у ерда журналистика, оммавий коммуникациялар соҳаси бўйича таҳсил олган. Жаклин Коломбода тележурналист бўлиб ишлаётган пайтда унга “Шри-Ланка гўзали” танловида иштирок этишни таклиф қилишган.
У лойиҳада муваффақиятни қўлга киритди ва Лос-Анжелесда бўлиб ўтган “Коинот гўзали-2006” танловида Шри-Ланка номини ҳимоя қилди. Афсуски, у топ-20 таликка кира олмади, бироқ мода саноати вакиллари 20 ёшли гўзалга эътибор қаратди ва шундан кейин у моделлик карьерасини кино олами билан муваффақиятли бирлаштирди.
Жаклин 2009 йилда ўз агентлигининг кўрсатмаси билан биринчи марта Ҳиндистонга борди. Актриса у ерда фақат қизиқиш туфайли Сужой Гҳошнинг “Оловуддин” комедик-фантастик фильми учун кастингга борди ва ҳинд тилида зўрға гапирса ҳам, малика Жасмин ролини ижро этди.
Фильм кассада муваффақиятсизликка учради. Баъзи танқидчилар актрисани танқид қилишди ва унга кино саноатига аралашмасликни маслаҳат берди. Бошқалар унинг ажойиб кўриниши ва жозибасига эътибор қаратди. Қандай қилиб бўлмасин, Жаклин ўз роли туфайли “Энг яхши актрисалик дебюти” номинациясида IIFА мукофотига сазовор бўлди.
Фернандес ҳар доим юқори мақсадлар ва истакларга эга қиз бўлган, шунинг учун у биринчи муваффақиятсизликдан умуман хафа бўлмади ва унга таклиф қилинган ролларга завқ билан розилик бера бошлади. Маҳеш Бҳаттнинг “Қотиллик-2” триллери актрисанинг биринчи тижорат муваффақияти ва карьерасидаги бурилиш нуқтаси бўлди.
Жаклин “Қотиллик-2” (2011 йил), “Уй-2” (2012 йил) ва “Пойга-2” (2012 йилда суратга олинган) фильмларида ажойиб хет-трик қайд этди, шундан сўнг у “Сиквеллар қироличаси” унвонини олди.
Кейинроқ Салмон Хон уни шогирдликка олди ва улар биргаликда “Зарба” (2014 йилда намойиш этилган) блокбастерида иштирок этди, бу лойиҳадаги рол Жекини Болливуднинг энг машҳур актрисаларидан бирига айлантирди.
У кўпинча машҳур қаҳрамонлар иштирокидаги катта бюджетли, қўшиқлар ва рақслари кўп бўлган ёшларга қаратилган фильмларни танлади. Унинг рақслари YouTube’да доимий равишда бир неча миллион марта кўрилмоқда.
Бироқ актриса 2020 йилда берган интервьюларининг бирида қувноқ ва юзаки қаҳрамонлар ролини ўйнашдан чарчаганини очиқчасига тан олди.
“Мен номаълум ва мураккаб нарсани синаб кўрмоқчи эдим. ‘Қотил аёл’ триллери фильмографиямда айнан шундай пайдо бўлди”, — дейди Жаклин.
Ҳозирда Жаклин ҳаётидаги энг яхши лаҳзаларни яшамаяпти, у 200 миллион доллар миқдоридаги пулга товламачилик йўли билан эга чиққанлик айби билан тергов қилинмоқда. Хабарларга кўра, актриса фирибгар Сукеш Чандрашекҳарнинг фирибгарлик ва товламачилик йўли билан қўлга киритган миллионлаб пулларидан “фойда олувчи” ҳисобланади. Сукеш Жаклинга 900 минг рупийлик мушук ёки 5 миллион рупийлик от каби қимматбаҳо совғалар берган.
.jpg)
Айтишларича, у турмуш қурган Чандрашекҳарнинг севгилиси бўлган, бироқ актриса буни рад этади. Ўтмишда у Баҳрайн шаҳзодаси Ҳасан бин Рашид Ал Халифа, шунингдек, “Уй” ва “Уй-2” фильмларида бирга ишлаган режиссёр Сожид Хон билан муносабатда бўлган. Жуфтлик уч йилдан кўпроқ вақт давомида учрашган, бироқ шунга қарамай муносабатларга нуқта қўйилган ва уларнинг тақдир йўллари бирлашмаган. Жаклин турмушга чиқмаган.
.jpg)
Албатта, бу воқеалардан кейин унинг обрўсига путур етди ва катта миқдордаги пул билан боғлиқ фирибгарлик иши сабабли бир нечта лойиҳа муаллифлари актриса билан шартномани бекор қилди. Бироқ Жаклинга Акшай Кумар ёрдам берди ва унга “Баччан Пандей”, “Рам Сету” ва “Селфи” лойиҳаларидан рол берди.
Изоҳ (0)