Ayni damda oilasi bilan AQSHda yashovchi Otabek Mahkamov “Daryo”ning YouTube’dagi kanaliga bergan intervyusida mashhur san’atkor unga ijod bilan shug‘ullanmaslikni maslahat bergani va ko‘chada qolgan kunlari haqida gapirib berdi.
— AQSHga endi borgan paytimda Chikago shtatiga to‘yga taklif qilishdi. U yerda O‘zbekistonda juda mashhur bo‘lgan xonandani uchratib qoldim. U guruh bo‘lib ijod qilardi va ularning ijodi menga juda yoqardi. Suhbat davomida AQSHga o‘qishga kelganim va bu yerda ham ijodimni davom ettirish niyatim borligini aytdim. “Ijodingizni davom ettirolmaysiz, chunki sizdan zo‘r xalq artistlari ham kelib, AQSHda ijod qilolgani yo‘q. Falonchi artist katta yuk mashinasini haydayapti, boshqasi esa keksa insonlarga qarab tirikchilik qilyapti”, dedi. Suhbat so‘ngida esa ijodni yig‘ishtirib, firmaga ishga kirishimni taklif qildi. “Ijod bilan shug‘ullansangiz, daromadingiz uyning bir xonasini ijraga olishga yetadi, firmaga ishga kirsangiz esa, yiligi 500 ming AQSH dollari topishingiz mumkin”, degan. To‘g‘ri, u paytda bu summa men uchun juda katta edi, ammo orzularimdan voz kechishimga arzimadi. Rahmat aytdim, o‘z bilganimdan qolmaganman. Instagram’da blog yaratib, videolarim mashhurlikka erishganidan keyin o‘sha inson men bilan aloqaga chiqib, “Tabriklayman, men ishonardim senga”, dedi. Suhbat davomida esa faoliyatini reklama qilib berishimni so‘radi. Pulini so‘raganida unga tekin ekanligini aytdim. Chunki uning gaplari menga antimotivatsiya bo‘lgan, — deydi Otabek Mahkamov.
Suhbatdoshimiz AQSHdagi hayoti davomida uysizlikdan qiynalgani haqida ham so‘zlab berdi.
— Kaliforniyada qiynalib qolganimda O‘zbekistondan borgan san’atkorlar “Nyu-Yorkka keling, yordam beramiz”, deyishgan. Uy-joy masalalari qanday bo‘ladi, u yerda hech kimni tanimayman, deganimda “Bizning uyimiz bor, ijara uyni uch kishiga bo‘lib to‘laymiz, muammo emas”, degan. Uning gapiga ishonib, 2016-yilning 9-sentabr kuni Nyu-Yorkka kelganman. “Faqat ijara pulini 1-sentabrdan hisoblab to‘laysiz, chunki bu Amerika”, deyishgan. Barcha shartlarga rozi bo‘lganman, ammo o‘sha kuni ijara pulini bersam olishmagan. Ertasi kuni ham bu hol takrorlangan. Keyin bilsam, ularning rejalari o‘zgarib, sherikchilikka meni emas, O‘zbekistondan borgan folbin o‘rtoqlarini qo‘ymoqchi bo‘lishgan ekan. O‘sha kuni biz tanishim bilan kechki ovqatni restoranda qilishga kelishgandik. Men uchrashuvga ketsam “Uzr, rejalar o‘zgardi, o‘rtog‘im kelib joylashdi. Qayerda ekaningizni aytsangiz, chamadoningizni yuboramiz. Telefonimning quvvati tugagan”, degan xabar keldi. Tanishimga aytsam, u ham uyida joy yo‘qligini aytib, uzr so‘radi. Qisqasi, hujjatlarim yonimda bo‘lmagani uchun biror mehmonxonaga ham joylasholmadim va ko‘chada qolib ketdim. Bu men uchun katta saboq bo‘ldi, — deydi Otabek Mahkamov.
Otabek Mahkamov AQSHda yashashning uchta yaxshi va yomon jihatlari haqida ham gapirib o‘tdi.
— Yaxshi jihatlari: erkinlik bor, mehnatkash inson orzulariga erishadi va 7 yil davomida birorta korrupsiya bilan bog‘liq holatlarga uchraganim yo‘q. Hatto mendan shu kungacha kimning farzandi ekanligimga ham qiziqishmadi. Yomon jihatlari esa ko‘p shtatlarda giyohvandlik, xususan, nasha bilan bog‘liq cheklovlar yo‘q. Qurol-yarog‘dan foydalanishga ham oddiy holdek qarashadi. Eng yomon jihatlaridan biri esa, bolalar ham shunchalik erkinki, hatto ota-onasini jazolash uchun politsiyaga murojaat qilishadi, — deydi Otabek Mahkamov.
Otabek Mahkamovga kitob yozish nima uchun kerak edi va uni chop etish uchun qancha mablag‘ sarfladi?
— Kitobim Turkiyadagi “Furqon” nashriyotida 3 ming nusxada chop etildi. Kitob tayyor holga kelguniga qadar 95 ming AQSH dollari pul sarflandi. To‘g‘ri, hamma xarajatlarni o‘zim qoplaganim yo‘q. Do‘stlarim bu borada qo‘llab-quvvatlashdi. Ammo kitob sifatli bo‘lishini va aynan uchta tilda chop etilishini istadim. Unda shu kungacha suhbatda bo‘lgan ko‘p insonlarim bilan bog‘liq xotiralarim va ulardan o‘rgangan jihatlarim haqida yozdim. Bu kitob bestseller bo‘lmasligi mumkin, ammo shu ishni qilishim kerak, deb hisobladim. Hech bo‘lmasa, nabiralarim kun kelib uni o‘qib, mening qanday inson bo‘lganim haqida tasavvurga ega bo‘lishadi, — deydi Otabek Mahkamov.
Suhbatni to‘liq holda quyida tomosha qilishingiz mumkin.
Izoh (0)