“Daryo”ning YouTube’dagi kanalida huquqshunos va ijodkor Otabek Mahkamov bilan suhbat tashkil etildi. U suhbat davomida onasining og‘ir darddan vafot etgani, AQSHdagi hayoti qiyinchilik bilan boshlangani va musofirchilikda qanday haqiqatlarni anglagani haqida so‘zlab berdi.
— Onam Ra’no Mahkamova 49 yoshida saraton kasalligi sabab vafot etgan. Qiyin ahvoldaligimizda oilamizga hech qanday yordam berilgani yo‘q. Albatta, odamning qancha yashashi Allohdan, ammo umrining uzayishiga qaysidir odamlar sababchi bo‘lishi mumkin. Hatto, jon berayotgan insonga ham yaxshi sharoitda jon berishiga yordam berish kerak.
U paytda 23 yoshda edim, maktabda oddiy o‘qituvchi bo‘lib ishlardim. Oylik daromadim ham haminqadar bo‘lgani uchun moddiy tomonlama juda qiyin vaziyatga tushganman. Bundan tashqari, shifokorlarning bilimsizligi, befarosat va qo‘pol muomalasidan juda ranjiganman. Uch oy mobaynida kasalxona hovlisida yashaganman, shunda bu sohadagi muammolarni o‘z ko‘zim bilan ko‘rganman. So‘nggi vaqtga qadar onamning sog‘ayib ketishiga umid qilganman. Chunki onam o‘z oyog‘i bilan kasalxonaga borgandi. Afsuski, onamning o‘limi oilamizga og‘ir zarba bo‘ldi. O‘shandayoq saraton va oqqon bilan og‘rigan bemor bolalarga yordam berishni niyat qilgandim. Hozirgi kunda xalqaro miqyosda xayriya tadbirlarini o‘tkazib, O‘zbekistondagi bolalarni davolashga ko‘maklashamiz, — deydi Otabek Mahkamov.
Otabek Mahkamov ilk marta AQSHga borganida qanday qiyinchiliklarga uchragani haqida so‘zlab berdi.
— 2015-yili o‘qish uchun AQSHga borganman. O‘zbekistonda ishim, o‘zimga yarasha daromadim bor edi. Advokatlikdan tashqari, film va kliplarga ham taklif etib turishardi. AQSHda hamma qatori men ham birdan yaxshi ishga joylasholmaganman. Pulim bor edi, ammo hamisha onamning “Zaxira puling bo‘lishi kerak”, degan gapiga amal qilib, kuniga faqatgina bir mahal ovqatlanardim. Bir kuni do‘konga kirib, yarim tayyor lapsha mahsulotini xarid qilayotganimda ortimdan bir o‘zbek yigiti kelib, tanishini aytgan. Albatta, AQSHda meni kimdir tanishi yoqimli holat. “Aka, nega bunaqa arzon lapshalarni yeyapsiz. Mening ham boshimdan o‘tgan, sizga yordam beraman”, deb ikki-uch xalta oziq-ovqat xarid qilib bergan. Olishni istamaganman, ammo “Chin ko‘ngildan, sizni filmlaringizni ko‘rib katta bo‘lganman”, degan gap-so‘zlariga ishonganman. Xullas, ertasi kuni o‘qishdan chiqsam uchdan ortiq do‘stim qo‘ng‘iroq qilgan, xabar yo‘llagan. Oxirgi qo‘ng‘iroq qilgan do‘stim bilan bog‘lansam “Qiynalib qolganingni nega bizga aytmading”, deb qoldi. Hayron bo‘lib sababini so‘rasam kecha menga yordam bergan yigit “Otabek Mahkamov AQSHda qiynalib qolibdi, arzon lapsha yeb yurgan ekan, ro‘zg‘orlik qilib berdim”, deb gap tarqatibdi. Bu gap albatta, g‘ururimga tegdi. Buning ustiga undan yordam so‘ramagandim-ku, deb o‘z-o‘zimni koyidim. Mana shu voqeadan keyin tekin pishloq faqatgina qopqonda bo‘lishini anglab yetdim, — deydi Otabek Mahkamov.
Otabek Mahkamov bilan to‘liq intervyuni quyida tomosha qiling:
Izoh (0)