Irlandiya bosh vaziri Leo Varadkar mamlakat hukumati Vladimir Putin vafot etgan taqdirda Rossiyaga hamdardlik bildirmaydi, degan fikrda. U Irlandiya delegatsiyasi Rossiya prezidentining dafn marosimida qatnashishiga ishonmasligini taʼkidladi.
The Independent yozishicha, faraz qilinayotgan vaziyat qariyb 80 yil oldingi voqealarga ishora qiladi. Irlandiya hukumati Ikkinchi jahon urushi davomida qat’iy betaraflik siyosatini olib borgan. Biroq o‘sha paytdagi tashqi ishlar vaziri Eamon de Valeraning 1945-yilda Adolf Gitler o‘z joniga qasd qilganida hamdardlik bildirishi xalqaro norozilik uyg‘otgan. Bu voqea de Valera va davlat obro‘siga katta zarar yetkazgan.
Irlandiya betaraflik siyosatini saqlab qolishda davom etayotganini ta’kidlasa-da, yuqori martabali hukumat vazirlari buni siyosiy betaraflik emas, balki harbiy betaraflik deb aytadi. O‘tgan hafta Kiyevga tashrifi chog‘ida Varadkar Ukrainani qancha kerak bo‘lsa, shuncha vaqt qo‘llab-quvvatlashga va’da berdi. Shuningdek, u Ukrainaga insonparvarlik yordami uchun qo‘shimcha mablag‘ ajratilishini ma’lum qildi.
Safardan so‘ng jurnalistlar siyosatchidan Putin vafot etgan taqdirda Irlandiya Rossiyaga hamdardlik bildiradimi, degan savolga Varadkar “bunday deb o‘ylamayman”, deya javob berdi va birozdan so‘ng qo‘shib qo‘ydi: “Yaxshi savol, bu haqda avval o‘ylab ko‘rmagan ekanman”.
“Dafn marosimida bizdan vakil bo‘lishini tasavvur qilolmayman”, — dedi Irlandiya hukumati rahbari.
Eslatib o‘tamiz, Varadkarga Rossiyaga kirish taqiqlangan. Noyabr oyida Kreml siyosatchini go‘yoki rusofobik his-tuyg‘ularni ifoda etgani uchun sanksiyalar ro‘yxatiga kiritgan.
Irlandiyaning urushdagi pozitsiyasi
Chetdan qaraganda Dublin Rossiyaning Ukrainaga hujumini jim kuzatayotgandek tuyuladi. Ammo aslida bunday emas.
Mamlakat rasmiylari Ukraina borasida qat’iy pozitsiyaga amal qiladi. Rasmiy Dublin ukrainalik qochqinlarga boshpana bergan va xalqaro miqyosda Ukraina taraf pozitsiyasini himoya qilmoqda. Rossiyaning Ukrainaga bosqini fonida irlandiyaliklar betaraflikdan voz kechish masalasini ham muhokama qilmoqda.
Izoh (0)