Ирландия бош вазири Лео Варадкар мамлакат ҳукумати Владимир Путин вафот этган тақдирда Россияга ҳамдардлик билдирмайди, деган фикрда. У Ирландия делегацияси Россия президентининг дафн маросимида қатнашишига ишонмаслигини таъкидлади.
The Independent ёзишича, фараз қилинаётган вазият қарийб 80 йил олдинги воқеаларга ишора қилади. Ирландия ҳукумати Иккинчи жаҳон уруши давомида қатъий бетарафлик сиёсатини олиб борган. Бироқ ўша пайтдаги ташқи ишлар вазири Эамон де Валеранинг 1945 йилда Адолф Гитлер ўз жонига қасд қилганида ҳамдардлик билдириши халқаро норозилик уйғотган. Бу воқеа де Валера ва давлат обрўсига катта зарар етказган.
Ирландия бетарафлик сиёсатини сақлаб қолишда давом этаётганини таъкидласа-да, юқори мартабали ҳукумат вазирлари буни сиёсий бетарафлик эмас, балки ҳарбий бетарафлик деб айтади. Ўтган ҳафта Киевга ташрифи чоғида Варадкар Украинани қанча керак бўлса, шунча вақт қўллаб-қувватлашга ваъда берди. Шунингдек, у Украинага инсонпарварлик ёрдами учун қўшимча маблағ ажратилишини маълум қилди.
Сафардан сўнг журналистлар сиёсатчидан Путин вафот этган тақдирда Ирландия Россияга ҳамдардлик билдирадими, деган саволга Варадкар “бундай деб ўйламайман”, дея жавоб берди ва бир оздан сўнг қўшиб қўйди: “Яхши савол, бу ҳақда аввал ўйлаб кўрмаган эканман”.
“Дафн маросимида биздан вакил бўлишини тасаввур қилолмайман”, — деди Ирландия ҳукумати раҳбари.
Эслатиб ўтамиз, Варадкарга Россияга кириш тақиқланган. Ноябрь ойида Кремль сиёсатчини гўёки русофобик ҳис-туйғуларни ифода этгани учун санкциялар рўйхатига киритган.
Ирландиянинг урушдаги позицияси
Четдан қараганда Дубльин Россиянинг Украинага ҳужумини жим кузатаётгандек туюлади. Аммо аслида бундай эмас.
Мамлакат расмийлари Украина борасида қатъий позицияга амал қилади. Расмий Дублин украиналик қочқинларга бошпана берган ва халқаро миқёсда Украина тараф позициясини ҳимоя қилмоқда. Россиянинг Украинага босқини фонида ирландияликлар бетарафликдан воз кечиш масаласини ҳам муҳокама қилмоқда.
Изоҳ (0)