Birlashgan Arab Amirliklari (BAA) prezidenti Muhammad bin Zayd al-Nahayonning ukasi Said bin Zayd al-Nahayon sog‘lig‘idagi muammolar tufayli vafot etdi. Bu haqda WAM xabar berdi.
Bir necha kun oldin BAA prezidenti ukasining sog‘lig‘i bilan bog‘liq muammolar ma’lum bo‘lgan. Qarindoshlar uni nima bezovta qilgani tafsilotlarini ochiqlamagan. Marhum Abu-Dabi hukmdorining vakili sifatida faoliyat olib borgan.
Shu munosabat bilan mamlakatda 29-iyulgacha uch kunlik motam e’lon qilingan.
Al-Nahayon sulolasi
Al-Nahayon — Abu-Dabidagi shayxlar (1761-yildan) va amirlarning hukmron sulolasi, shuningdek, BAAning amalda merosxo‘r prezidentlari (1971-yildan hozirgi kungacha).
2022-yil 14-maydan beri shayx Muhammad bin Zayd al-Nahayon BAA prezidenti lavozimida faoliyat yuritmoqda. Shayx Said bin Zayd al-Nahayon BAAning amaldagi prezidentining ukasi.
Shayx Said hayoti va faoliyati
Shayx Said 1965-yilda al-Ayn shahrida tug‘ilgan va 1988-yilda BAA universitetida siyosiy fanlar bo‘yicha bakalavr darajasini olgan. O‘qishni tamomlagach, Abu-Dabiga rejalashtirish vazirining o‘rinbosari etib tayinlandi. 1991—1996-yillarda dengiz portlari departamenti raisi lavozimida ishlagan.
U BAAning birinchi prezidenti va asoschisi Shayx Zayd bin Sulton al-Nahayonning xalqaro rasmiy tashriflardagi vakili ham bo‘lgan. 2002—2003-yillarda BAA futbol assotsiatsiyasi prezidenti lavozimida ishlagan.
Shayx Said bin Zayd al-Nahayon BAAda yirik rivojlanish loyihalarini amalga oshirishda muhim rol o‘ynagan, Abu-Dabi Ijroiya kengashi, Abu-Dabi Iqtisodiy rivojlanish kengashi a’zosi va “Al Vahda” sport klubi raisi bo‘lgan.
Izoh (0)