Armaniston Belarusda Kollektiv xavfsizlik shartnomasi tashkiloti rahbarligida sentabr oyida bo‘lib o‘tadigan “Skala—2023” mashg‘ulotlarida qatnashishdan bosh tortdi. Bu haqda Armaniston ichki ishlar vazirligiga tayanib, Rossiya matbuoti xabar berdi.
Qayd etilishicha, bunday qarorga Armaniston “Ichki ishlar vazirligi qutqaruv xizmati zimmasida kasbiy yuklama ko‘pligi” sabab bo‘lgan.
Belarusdagi mashg‘ulotlar mavzusi yadroviy obyektda avariya yuz bergan taqdirda uning oqibatlarini bartaraf etish bo‘lishi aytilmoqda.
“Umid qilamanki, hech qachon buni amalda qo‘llashga to‘g‘ri kelmaydi, lekin tinchlikni xohlasangiz, urushga tayyorlanishingiz kerak. Boshqacha aytganda, agar favqulodda vaziyatni muvaffaqiyatli bartaraf etishni istasangiz, uni bartaraf etishga tayyor bo‘ling”, — dedi Belarus Favqulodda vaziyatlar vazirligi rahbari Vadim Sinyavskiy.
Yil boshida Armaniston KXSHTning 2023-yilgi o‘quv mashg‘ulotlarini o‘z hududida o‘tkazishdan bosh tortgan edi.
Armaniston va KXSHT munosabatlari sovuqlashgan
Ma’lumot uchun Armaniston va KXSHT o‘rtasidagi munosabatlar 2020-yilda Tog‘li Qorabog‘ uchun kurash boshlanganidan so‘ng, KXSHT Yerevanga sezilarli amaliy yordam ko‘rsatmagani ortidan sovuqlashgan.
Iyun oyi boshida Armaniston Xavfsizlik kengashi kotibi Armen Grigoryan Yerevanning KXSHTga a’zoligi mamlakat uchun “maʼlum muammolar” tug‘dirayotganini aytdi. Xususan, bu Armanistonga G‘arb davlatlaridan harbiy yordam olish imkoniyatiga ta’sir qilmoqda, deb ta’kidladi rasmiy.
KXSHT Armanistonga qanday naf keltiryapti, degan savolga javob berar ekan, Grigoryan 2020-yildan beri biror yordam ko‘rsatilganiga misol topish qiyinligini ta’kidladi.
Avvalroq Armaniston bosh vaziri Nikol Pashinyan mamlakat Ukrainadagi urushda na Rossiyaning, na G‘arbning ittifoqchisi ekanini ma’lum qildi.
Izoh (0)