Andijon viloyatida tadbirkorning elektr qarzdorligini yo‘q qilib berish evaziga pul so‘ragan shaxslar qo‘lga olindi, deb xabar beradi Bosh prokuratura huzuridagi departament.
Qayd etilishicha, departament hamda DXXning Andijon viloyati boshqarmalari tomonidan tadbirkorlik subyektlarining huquqlarini himoya qilish yuzasidan tezkor tadbir o‘tkazilgan. Tadbirda muqaddam firibgarlik jinoyati uchun sudlangan A.Sh. va O.O‘. “I.Ch.” xususiy korxonasi ish boshqaruvchisi M.A.ga ishlab chiqarish sexidagi elektr hisoblash uskunasi nosoz ishlayotganini, buning oqibatida 56 million so‘mlik elektr energiyasi qarzdorligi hisoblanmay qolganini aytib, ushbu qarzdorlikni yo‘q qilib berishlari evaziga 15 million so‘mni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Bir necha kun oldin Andijon viloyati va Toshkent shahrida gaz, elektr hamda suv taʼminoti xodimlarining firibgarlik holatlari fosh etilgani to‘g‘risida xabar berilgandi. Shuningdek, Buxoroda 165 mln so‘mlik kredit mablag‘larini o‘z ehtiyojlari uchun sarflab yuborgan hokim yordamchisi aniqlangan edi.
Izoh (0)