Andijon viloyati va Toshkent shahrida gaz, elektr hamda suv taʼminoti xodimlarining firibgarlik holatlari fosh etildi, deb xabar bermoqda Iqtisodiy jinoyatlarga qarshi kurashish departamenti axborot xizmati.
Unga ko‘ra, holatlardan biri Bosh prokuratura huzuridagi departamentning Toshkent shahar boshqarmasi tomonidan IIBB xodimlari bilan hamkorlikda tadbirkorlik subyektlarining huquqlarini himoya qilish yuzasidan o‘tkazilgan tezkor tadbirda aniqlangan. “Mirobodtumangaz” gaz taʼminoti bo‘limi yetakchi muhandisi R.M. tadbirkor M.A.ning Yashnobod tumanidagi Aviasozlar ko‘chasida joylashgan noturar binosini gazlashtirish bo‘yicha loyiha hujjatlarini rasmiylashtirib berishi hamda gaz hisoblagich o‘rnatib berish evaziga tadbirkordan 18 million so‘mni olgan vaqtida ashyoviy dalillar bilan ushlangan.
Shu kabi, departamentning Andijon shahar bo‘limi tomonidan IIB xodimlari bilan hamkorlikda o‘tkazilgan tezkor tadbirda Andijon tuman ETK elektromontyori M.I. va fuqaro O.N. fuqaro M.I.ning xonadonidagi elektr taʼminotidan 7 million so‘m qarzdorligini yo‘q qilib berishi evaziga 3,5 million so‘mni olgan vaqtida ashyoviy dalillar bilan ushlangan.
Xuddi shunday, departamentning Qo‘rg‘ontepa tuman bo‘limi tomonidan o‘tkazilgan tezkor tadbirda tuman “Suvtaʼminoti” MCHJ bo‘lim nazoratchisi M.O. “U.X.” MCHJ oshxonasining suv sarfini hisoblash uskunasining yaroqsizligi yuzasidan rasmiylashtirgan dalolatnoma bo‘yicha jarima qo‘llamaslik va yangi hisoblagich o‘rnatib berish evaziga MCHJ ish yurituvchisi M.A.dan 3 million so‘mni olgan vaqtida ashyoviy dalillar bilan ushlangan.
Izoh (0)