Xorazm viloyatining Xonqa tumanida 2 600 dan ortiq baliq nobud bo‘lgani aniqlandi. Bu haqda viloyat prokuraturasi axborot xizmati xabar berdi.
Ma’lum qilinishicha, ijtimoiy tarmoqlar orqali Xonqa tumani, “Madir” qishlog‘i hududida ichki zaxkashda baliqlar o‘lib qolgani to‘g‘risida tarqalgan videomurojaat yuzasidan Xorazm viloyati Ekologiya va atrof muhitni muhofaza qilish boshqarmasi tomonidan o‘rganish o‘tkazildi.
Aniqlanishicha, “Madir” qishlog‘i va “Ilg‘or” mahallasida joylashgan “Xonqa billur salt” tuz va yodlangan tuz mahsulotlari ishlab chiqarish xususiy korxonasi tomonidan tuzlarni qayta ishlash jarayonida hosil bo‘ladigan tarkibida ifloslantiruvchi moddalari bo‘lgan oqava suvlar zaxkashga oqizilgan.
Oqibatda 2 370 ta karas, 240 ta gambus, 46 ta shamayka, 5 ta lesh, 3 ta ilon bosh va 1 ta oq amur, jami 2 665 ta turli xildagi baliqlar nobud bo‘lgan va hayvonot dunyosiga 223 million 380 ming so‘m moddiy zarar yetkazilgan.
Holat yuzasidan Xonqa tumani IIB huzuridagi tergov guruhi tomonidan Jinoyat kodeksining 196-moddasi 1-qismi (atrof tabiiy muhitni ifloslantirish: yerlarni ifloslantirish yoki buzish, suv yoki atmosfera havosini ifloslantirish odamlarning ommaviy ravishda kasallanishi, hayvonlar, parrandalar yoki baliqlarning qirilib ketishi yoki boshqacha og‘ir oqibatlarga sabab bo‘lsa) bilan jinoyat ishi qo‘zg‘atilib, tergov harakatlari olib borilgan.
Tergov natijasiga ko‘ra, Jinoyat protsessual kodeksining 83-moddasi 2-bandiga asosan jinoyat ishi tugatilgan. Mazkur qarorning qonuniyligi tuman prokuraturasi tomonidan o‘rganilib, bekor qilingan va tergov harakatlarini o‘tkazish uchun Xonqa tumani IIB huzuridagi TGga yuborilgan.
Jinoyat ishining tergovi viloyat prokuraturasi tomonidan nazoratga olingan.
Izoh (0)