O‘zbekistonning qator viloyatlarida tabiiy resurslardan noqonuniy foydalanish holatlari fosh etilmoqda, deb xabar beradi Bosh prokuratura huzuridagi departament.
Qayd etilishicha, departamentning Boysun tuman bo‘limi tomonidan “Suvinspeksiya” Surxondaryo viloyat hududiy bo‘limi xodimlari bilan hamkorlikda tergovga qadar tekshiruv o‘tkazilgan. Tekshiruv davomida hududdagi 7 ta fermer xo‘jaligi masʼul shaxslari hech qanday hujjatsiz magistral ichimlik suvi tarmog‘iga o‘zboshimchalik bilan ulanib, davlat va jamiyat manfaatlariga jami 1,2 milliard so‘m zarar yetkazgani aniqlangan.
Xuddi shunday, departamentning Farg‘ona viloyat boshqarmasi tomonidan o‘tkazilgan tergovga qadar tekshiruvda “S.S.” fermer xo‘jaligi rahbari B.N. Quva tumani “Madaniyat” MFY suv nasoslarini hech qanday hujjatlarsiz umumiy foydalanishdagi elektr tarmog‘iga o‘zboshimchalik bilan ulab, jami 481,5 million so‘mlik elektr energiyasidan noqonuniy foydalangani ma’lum bo‘lgan.
Departamentning Qo‘shtepa tuman bo‘limi tomonidan ETK xodimlari bilan hamkorlikda o‘tkazilgan tergovga qadar tekshiruvda esa “D.” fermer xo‘jaligi masʼul shaxslari dala maydonini sug‘orish uchun o‘rnatilgan suv nasosini umumiy foydalanishdagi tarmoqqa elektron dasturga kiritilmagan hisoblagich orqali o‘g‘rilik yo‘li bilan ulab, jami 148,9 ming kVt/s elektr energiyasidan noqonuniy foydalanib kelgani aniqlangan.
Zangiota tumanida bo‘lsa fuqaro Sh.I. Erkin ko‘chasidagi uyda hech qanday hujjatsiz tashkil etgan fermada umumiy foydalanishdagi gaz tarmog‘iga o‘g‘rilik yo‘li bilan ulanib, jami 130 million so‘mlik tabiiy gazdan noqonuniy foydalanib kelgani aniqlangan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) va 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Jizzax, Andijon va Farg‘ona viloyatlarida elektrdan noqonuniy foydalanganlar 913,5 million so‘m zarar yetkazgani to‘g‘risida xabar berilgandi. Shuningdek, O‘zbekistonning uch viloyatida gaz va svetdan noqonuniy foydalanganlar qariyb 352 mln so‘m zarar yetkazgandi.
Izoh (0)