Toshkent viloyati Olmaliq shahrida erkak ikki yosh bolani axloqsiz harakatlar qilishga majburlagani aks etgan video ijtimoiy tarmoqlarda tarqalib ko‘plab muhokamalarga sabab bo‘ldi. Bosh prokuratura holat yuzasidan dastlabki ma‘lumotlarni berdi.
Unga ko‘ra, Olmaliqda yosh bolalarni axloqsiz harakatlar qilishga majburlagan fuqaroning shaxsi ichki ishlar xodimlari tomonidan aniqlandi. Surishtiruv davomida ushbu shaxs ruhiy kasalliklar dispanserida ro‘yxatda turishi maʼlum bo‘ldi. Surishtiruv ishlari davom etmoqda.
Respublika tibbiy ijtimoiy ekspertiza inspeksiyaning tegishli maʼlumotiga ko‘ra, fuqaro bolaligidan 2 guruh nogironi. Holat yuzasidan yaqinlari bilan o‘tkazilgan profilaktik suhbat va tergovga qadar surishtiruv davomida uning hozirgi holati mutaxassislar tomonidan o‘rganilib, davolanishi uchun Olmaliq shahridagi ruhiy asab kasalliklari dispanseriga joylashtirildi.
Hozirda holat yuzasidan tergovga qadar surishtiruv davom ettirilmoqda.
Bolalarda kuzatilgan shu kabi holatlar
Farg‘ona shahar Yangi Asr ko‘chasida joylashgan qurilishi tugallanmagan bino yonidan 20-iyul kuni 11 yoshli qizchaning murdasi zo‘rlash va qotillik alomatlari bilan topilgani haqida xabar berilgan edi. Keyinchalik holat yuzasidan yangi tafsilotlar ochiqlandi. Qizaloqning yaqinlari tomonidan berilgan ma‘lumotlarga ko‘ra, 19-iyul kuni o‘zlariga tanish bo‘lgan oila farzandi — 2006-yilda tug‘ilgan, Farg‘ona shahridagi 16-umumiy o‘rta ta‘lim maktabining 11-sinf o‘quvchisi qizning uyiga kelib onasi uni chaqirayotganini aytgan va uydan olib chiqib ketgan. 11 yoshli qizaloq ota-onasining yolg‘iz qizi bo‘lgan.
Mazkur holat yuzasidan Jinoyat kodeksining 97- (qasddan odam o‘ldirish), 118- (nomusga tegish) va 119-moddalari (jinsiy ehtiyojni zo‘rlik ishlatib g‘ayritabiiy usulda qondirish) bilan jinoyat ishi qo‘zg‘atilgan.
Bundan oldin Toshkent shahar Yangihayot tumanida 12 yoshli qizni zo‘rlab, so‘ng uni o‘ldirgan erkak ishi sudga yuborilgani haqida xabar berilgan edi. Sud hukmi bilan ushbu jinoyatni sodir etgan shaxs o‘ta xavfli retsidivist deb topilib, unga uzil-kesil umrbod ozodlikdan mahrum qilish jazosi tayinlangan.
Izoh (0)