17-iyulga o‘tar kechasi Qrim ko‘prigida sodir bo‘lgan portlashda Ukraina Xavfsizlik xizmati (UXX) va Ukraina Harbiy-dengiz kuchlarining ishtiroki bor, deb xabar bermoqda “Ukrainskaya pravda” va “RBK-Ukraina” nashrlari UXXdagi manbalarga tayanib.
Manbalarga ko‘ra, ko‘prikka suv usti dronlari yordamida hujum qilingan.
“Ko‘prikka yetib borish qiyin bo‘ldi, lekin oxir-oqibat bunga erishdik”, — degan “RBK-Ukraina” manbasi.
Ukraina xavfsizlik xizmati bu bayonotlarga hozircha izoh bermadi.
Anneksiya qilingan Qrim parlamenti rahbari Vladimir Konstantinov ham Qrim ko‘prigiga hujumda Ukraina kuchlarini aybladi.
“Bugun tunda Kiyevdagi terrorchi rejim yangi jinoyat sodir etdi – Qrim ko‘prigiga hujum qildi”, — deb yozadi Konstantinov Telegram’da.
17-iyulga o‘tar kechasi Qrim ko‘prigida portlash sodir bo‘ldi. Rossiya rasmiylariga ko‘ra, ikki kishi halok bo‘lgan va bir kishi jarohatlangan. Ko‘prikda harakat to‘xtatildi. Ukraina Qurolli kuchlari Qrim ko‘prigidagi portlash Rossiyaning provokatsiyasi ekanini istisno qilmadi.
Ukraina xavfsizlik xizmati rahbari Vasiliy Malyuk avvalroq Qrim ko‘prigini Ukraina uchun “qonuniy nishon” deb bilishini aytgandi, deb eslatdi “RBK-Ukraina”.
2022-yil oktabr oyida Qrim ko‘prigida portlash sodir bo‘lib, ko‘prikda harakatlanish to‘xtatilgan edi. Rossiya FXX portlashda Ukraina razvedkasini aybladi. Kiyev buni bevosita tasdiqlamagan, ammo Ukraina Mudofaa vazirligi keng ko‘lamli urushning dastlabki 500 kunidagi muvaffaqiyatlari qatoriga ko‘prikdagi portlashni ham kiritgan.
Izoh (0)