O‘rta Yer dengizi orqali Yevropa Ittifoqiga o‘tish uchun xavfli urinishlar qilayotgan muhojirlar soni ortib borishi fonida Bryussel va Tunis noqonuniy migratsiyaga qarshi birgalikda kurashni kuchaytirishga qaror qildi. Tegishli hujjat imzolangani haqida 16-iyul kuni Yevrokomissiya rahbari Ursula fon der Lyayyen, Italiya va Niderlandiya bosh vazirlari Mark Ryutte va Jorja Meloni hamda Tunis prezidenti Kays Said ma’lum qildi.
Ushbu kelishuvga ko‘ra, Yevropa Ittifoqi og‘ir iqtisodiy ahvolga tushib qolgan Shimoliy Afrika davlatiga 900 million yevro miqdorida moliyaviy yordam ko‘rsatadi. Yevropa siyosatchilari ishtirokida ushbu kelishuv bo‘yicha muzokaralar taxminan bir oy oldin Tunisda bo‘lib o‘tgan. O‘z navbatida, Tunis noqonuniy migratsiyaga faol qarshilik ko‘rsatish va kontrabandachilarning o‘z qirg‘oqlaridan Yevropaga borishga urinishini to‘xtatish majburiyatini oldi.
“Yaxshi kelishuvlar paketini tuzdik. Endi ularni amalda qo‘llashimiz kerak”, — dedi Ursula fon der Lyayyen.
Said esa kelishuvlarni “imkon qadar tezroq” amalga oshirishga va’da berdi. U noqonuniy migratsiya atrofidagi vaziyatni “g‘ayriinsoniy” deb atadi va bu muammoni birgalikda hal qilish mumkin, degan fikrni bildirdi.
Yevropa Ittifoqining pullari nimaga sarflanadi?
YI mablag‘laridan 100 million yevro dengizda muhojirlarni qidirish va qutqarish, shuningdek, ularni o‘z vataniga qaytarish uchun yo‘naltirilishi rejalashtirilmoqda. Bu summa shu paytgacha Tunisga Yevropa budjetidan ushbu maqsadlar uchun ajratilgan o‘rtacha yillik mablag‘dan uch baravar ko‘p.
Qayd etilishicha, joriy yilda Yevropa Ittifoqiga O‘rta Yer dengizi orqali kelgan noqonuniy muhojirlar soni keskin oshgan. Ko‘pchilik uchun Tunis tranzit nuqtasi hisoblanadi. Muammo, ayniqsa, Italiya uchun keskin. Yil boshidan buyon u yerda dengiz orqali mamlakatga kelgan 75 ming muhojir ro‘yxatga olingan. Bu ko‘rsatkich o‘tgan yilning shu davrida 31,9 ming edi.
Italiya bosh vaziri Jorja Meloni YI Shimoliy Afrikaning boshqa davlatlari bilan Tunis kelishuviga o‘xshash shartnomalar tuza olishiga umid qilayotganini aytdi.
Ayni paytda Tunisga pul o‘tkazilishi uchun yana bir masala bo‘yicha ijobiy qaror qabul qilinishi kerak. Mamlakat haligacha Xalqaro valyuta jamg‘armasi va’da qilgan 1,9 milliard dollarlik kreditni olmagan, chunki prezident Said zarur islohotlarni amalga oshirish bo‘yicha majburiyatlarni o‘z zimmasiga olmayapti, deb eslatadi dpa agentligi.
Izoh (0)