Тошкентда 37 ёшли аёл ўзи яхши кўрган эркак бошқа биров билан юриб кетмаслиги учун уни қаматмоқчи бўлди. Бу ҳақда пойтахт ИИББ ахборот хизмати хабар берди.
Қайд этилишича, Мирзо Улуғбек тумани ИИБ навбатчилик қисмига мурожаат қилган аёл алданганини маълум қилган. Навбатчи томонидан чақирилган тезкор-қидирув хизмати ходими ариза муаллифини тинглаб, у ўз кўрсатмасида кўп бора чалкашликларга йўл қўйганига эътибор қаратган.
37 ёшли Шоира (исмлар ўзгартирилган) ўз аризасида Носир исмли шахсга нисбатан қонуний чора кўрилишини сўраган. Аёлнинг сўзларига кўра, у Носир билан яқинда танишган бўлиб, бозорда тасодифан учрашиб қолган. Эркак ундан қўнғироқ қилиб олиш учун телефонини бериб туришни сўраган.
Шоира унга телефонини берган ва суҳбатга халақит бермаслик учун бир неча қадам нарига кетган. Аёл бозор расталаридаги товарларга кўз югуртириб чиққунича, Носир кетиб қолган. Шоира телефони нархи 5,6 миллион сўмни ташкил этганини, эркакнинг исми ва тахминий яшаш жойидан бошқа маълумотларни билмаслигини айтган.
Орадан бир кун ўтмай, Шоира яна ИИБ навбатчилик қисмига келиб, Носир унга пичоқ билан таҳдид қилиб, 5,5 миллион сўмлик телефонини олиб кетгани тўғрисида янги ариза ёзган.
Тезкор-қидирув хизмати ходимлари гумонланувчининг шахсига аниқлик киритган. Маълум бўлишича, 30 ёшли Носир Шоира билан бирга яшаб келган. Ходимлар эркакка айбловни айтганида, у мазкур воқеадан шокка тушиб қолган.
Носирнинг айтишича, у Шоира билан қарийб ярим йилдан бери таниш бўлиб, охирги ойларда уларнинг муносабати ёмонлашган. Барчасида аёлнинг рашки сабаб бўлиб, у эркакка жаҳл қилиб юрган: Шоира уни йўқотиб қўйишдан қўрққан, шу боисдан ҳам аёл шу каби усулда унга туҳмат қилган.
Шоира аввалига ўз айбига иқрор бўлмаган, аммо рад этиб бўлмас далиллар келтирилганидан сўнг у ҳақиқатни тан олиб, Носирнинг тахминларини тасдиқлаган.
Ҳолат бўйича Жиноят кодексининг 139 (туҳмат), 237 (ёлғон хабар бериш) ва 238-моддалари (ёлғон гувоҳлик бериш) билан жиноят иши қўзғатилган. Жиноят ишлари бўйича Мирзо Улуғбек туман судининг ҳукми билан 37 ёшли Шоира айбли деб топилди. Аёлнинг уч нафар вояга етмаган фарзанди борлиги инобатга олиниб, унга икки йиллик шартли қамоқ жазоси тайинланган.
Изоҳ (0)