Misrdan С gepatitiga qarshi “Daklatasvir” dori vositasining sakkizinchi partiyasi 15-iyul kuni Toshkentga yetkazib berildi, deb xabar bermoqda “Dunyo” AA.
Qayd etilishicha, mazkur insonparvarlik yordamida O‘zbekiston prezidentining 2023-yil 20–21-fevral kunlari Misrga amalga oshirilgan rasmiy tashrifi davomida erishilgan kelishuvlar hamda davlat rahbarining Gepatit C kasalligini 100 foiz davlat hisobidan davolash bo‘yicha saylovoldi tashabbusining ijrosi doirasida Misr sog‘liqni saqlash vazirligi bilan olib borilgan muzokaralar natijasida amalga oshirildi.
Umumiy hajmi 114 qutida 3 ming donadan ortiq “Daklatasvir” dori vositalari O‘zbekiston Sog‘liqni saqlash vazirligi huzuridagi Virusologiya ilmiy-tekshirish instituti tomonidan shifotalab bemorlarga taqsimlanadi.
Ta’kidlanishicha, Misr gepatit B va C viruslariga qarshi kurashda dunyo miqyosida sezilarli muvaffaqiyatlarga erishgan.
Misr Sog‘liqni saqlash vazirligi maʼlumotiga ko‘ra, mamlakat aholisi ushbu kasallikdan butunlay forig‘ bo‘lgan va bu haqida vazir Xalid Abdug‘affor 2023-yilning 21–30-may kunlari Jenevada bo‘lib o‘tgan JSSTning 76-sessiyasida maʼlum qildi. Xalqaro tashkilot mutaxassis va ekspertlari Misrning ushbu yo‘nalishdagi yutuqlarini o‘rgandi va joriy yilning iyun oyida tegishli hisobot eʼlon qilishi hamda gepatit C virusi batamom barham topilgani haqidagi shahodatnoma Misr hukumatiga taqdim etilishi kutilmoqda.
Mutaxassislarning aytishicha, Misr hukumati mazkur yutuqlarga erishish uchun “100 million sog‘lom hayot” milliy dasturini ishlab chiqib, uni muvaffaqiyatli amalga oshirmoqda. Bunda asosiy eʼtibor dunyoning mashhur farmatsevtika kompaniyalari bilan yaqindan hamkorlik aloqalarini o‘rnatish va kengaytirishga qaratilmoqda.
Ma'lumot uchun, Misrdan С gepatitiga qarshi dori vositalari 29-apreldan buyon bir necha partiyalarda olib kelinmoqda.
Izoh (0)