Jizzax viloyati Baxmal tumanida er-xotin janjali sabab bir fuqaro halok bo‘ldi. Bu haqda Ichki ishlar vazirligi xabar qildi.
Qayd etilishicha, tumanning “Gulbuloq” mahallasida yashovchi erkak turmush o‘rtog‘i bilan rashk sabab janjallashgan. Bundan xabar topgan er-xotinning qarindoshlari kelishmovchilikka aralashgan. Yuz bergan mushtlashuvda erkakning otasiga tesha bilan og‘ir tan jarohati yetkazilgan.
Oqibatda jabrlanuvchi qishloq vrachlik punktida ko‘rsatilgan tibbiy yordamga qaramay, vafot etgan.
Sud tibbiy ekspertizasi marhumning o‘limiga bosh miya yopiq jarohati, bosh miya va bosh miya pardalari ostiga, shuningdek, miyachaga qon quyilishi, bosh miya to‘qimasining ezilishi va siqilishi natijasida bosh miyadagi hayot uchun muhim bo‘lgan markazlarning falajlanishi sabab bo‘lganini qayd etgan.
Qotillikni sodir etgan shaxsga nisbatan Jinoyat kodeksining 104-moddasi 3-qismi “d” bandi (jabrlanuvchining o‘lishiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilgan. Unga qamoq ehtiyot chorasi qo‘llanilgan. Hozirda tergov harakatlari olib borilmoqda.
Avvalroq Samarqandda yigit folbin va uning qizini o‘ldirgani, Samarqandda ruhiy nosog‘lom yigit otasini 15 marta pichoq urib o‘ldirgani, Andijonda 78 yoshli ayol uyidan o‘lik holda topilgani haqida xabar berilgan.
Mavzuga doir:
Izoh (0)