O‘zbekistonda hafta davomida havo harorati biroz pasayadi — “O‘zgidromet”

O‘zbekistonda 17–21-iyul kunlari havo haroratining nisbatan o‘zgarib turishi kutilmaydi. Bu haqda “O‘zgidromet” xabar berdi.

Haftaning boshi biroz issiq — kunduz kunlari 35-40 daraja atrofida, janubda ba’zi joylarda 42-44 daraja bo‘ladi. Hafta o‘rtasidan harorat foni 33-38 darajagacha pasayishi kutilmoqda. Respublika janubida ham harorat 2-3 darajaga pasayadi.

Ushbu hafta davomida hududning katta qismi bo‘yicha asosan quruq va kam bulutli ob-havo bo‘lishi kutilmoqda, faqat Qoraqalpog‘iston Respublikasi va Xorazm viloyatida 17-iyuldan 18-iyulga o‘tar kechasi, shuningdek, 19–21-iyul kunlari O‘zbekistonning tog‘li hududlarida qisqa muddatli yomg‘ir yog‘ishi, momaqaldiroq bo‘lishi mumkin.

17–18-iyul kunlari shimolda va cho‘l hududlarda, 19–20-iyul kunlari respublika bo‘yicha ba’zi joylarda shamol tezligi 15-20 metr/sekundgacha kuchayishi, ayrim joylarda chang-to‘zon bilan kuzatilishi kutilmoqda.

Toshkent shahrida havo kam bulutli bo‘ladi, yog‘ingarchilik kutilmaydi. Shamol sharqdan 5-10 metr/sekund tezlikda esadi, 19-20 iyulda 12-15 metr/sekundgacha kuchayishi, ayrim joylarda chang-to‘zon bilan kuzatilishi mumkin. Harorat asosan kunduz kunlari 37-40 daraja, ish haftasining oxirigacha 36-38 daraja bo‘ladi.

“O‘zgidromet” hafta boshida havo harorati biroz ko‘tarilishi, ammo bu ko‘tarilish yana qisqa muddatli bo‘lishini ma’lum qilgandi.