Bayden zaxiradan 3 000 askarni Yevropaga yuborishga ruxsat berdi

AQSH Mudofaa vazirligi kelajakda zaxiradan 3 000 nafargacha harbiy xizmatchini Yevropada joylashtirishi mumkin.

 “Biz NATOning Atlantic Resolve operatsiyasini AQSH Qurolli kuchlarining Yevropa qo‘mondonligi (EUCOM) masʼuliyatidagi zonada va uning atrofida samarali o‘tkazish uchun Amerika qo‘shinlarining faol kontingentini kuchaytirishimiz kerak”, — deyiladi AQSH prezidenti Jo Bayden tomonidan imzolangan yangi buyruqda.

EUCOM qayd etishicha, ushbu farmon AQSHning Yevropadagi qo‘shinlari sonini o‘zgartirmaydi. Gap qo‘shimcha kuchlar haqida ketayotgani yo‘q, dedi Pentagon qo‘shma qarorgohi operatsiyalar bo‘limi boshlig‘i Duglas Sims jurnalistlarga. Aksincha, zaxiradagi harbiy xizmatchilar ilgari faol kontingent tarkibida bo‘lgan harbiy xizmatchilarning vazifalarini bajarishi mumkin bo‘ladi.

Pentagon ularni qanday joylashtirish bo‘yicha yakuniy qaror EUCOM qo‘mondonligida qolishini ma’lum qildi.

“Bu Rossiyaning Ukrainaga qarshi noqonuniy va asossiz urushidan so‘ng NATOning sharqiy qanoti mudofaasini qo‘llab-quvvatlashga sodiqligimizni tasdiqlaydi”, — dedi Sims.

AQSH mudofaa vaziri Lloyd Ostin zaxiradagi askarlarni yaqin orada joylashtirishni rejalashtiryaptimi yoki yo‘q, noma’lum, deb yozdi Politico. Ammo ushbu harakat AQSH armiyasining Yevropadagi o‘quv missiyasida qatnashayotgan faol qo‘shinlarga qanchalik yuk tushayotganini ko‘rsatadi, deb ta’kidladi nashr.