12-iyul kuni Shimoliy Koreya tomonidan uchirilgan qit’alararo ballistik raketa Rossiyaning eksklyuziv iqtisodiy zonasiga tushgani haqida hech qanday ma’lumot yo‘q, dedi Rossiya Tashqi ishlar vazirligi matbuot kotibi Mariya Zaxarova.
Avvalroq Birlashgan Millatlar Tashkiloti bosh kotibi yordamchisi Xolid Xiari o‘z bayonotida KXDR raketasi Rossiyaning eksklyuziv iqtisodiy zonasiga qulagani haqida aytgandi. Uning so‘zlariga ko‘ra, raketa KXDR vaqti bilan soat 10:00 da (Toshkent vaqti bilan 08:00) Pxenyan tumanidan tikka trayektoriya bo‘ylab uchirilgan. U taxminan 1 000 kilometr masofani bosib o‘tgan va 6 648,4 kilometr balandlikka ko‘tarilgan, shundan so‘ng Rossiyaning eksklyuziv iqtisodiy zonasida dengizga qulagan.
“Birlashgan Millatlar Tashkilotining raketa parvozi yo‘nalishini aniqlay olishi quvonarli. Bunday aniqlik va tezkorlikni hisobga olib, biz tez orada kotibiyatdan uzoq kutilgan savolga javob olamiz, degan umiddamiz: Zaporojye AESni kim o‘qqa tutyapti?” — deb yozdi Zaxarova Telegram kanalida.
12-iyul kuni Shimoliy Koreya uzoq masofali ballistik raketani sinovdan o‘tkazgani haqida Janubiy Koreya Qurolli kuchlari shtab boshliqlari qo‘mitasi hamda yaponiyalik harbiylar xabar qilgan edi, ammo ular raketa turiga aniqlik kiritmagan.
Ertasi kuni tarqatilgan Koreya markaziy axborot agentligi xabarida Shimoliy Koreya “Xvasonpxo-18” raketasini uchirgani aytildi. Sinovlarga shaxsan davlat rahbari Kim Chen In rahbarlik qilgan. Agentlik keltirgan masofa, balandlik va parvoz vaqtiga oid ma’lumotlar yuqorida keltirilgan raqamlarga o‘xshash. Koreya markaziy axborot agentligi raketa Sharqiy Koreya dengizi (Yapon dengizi) suvlariga qulaganini yozdi.
Bu “Xvasonpxo-18” raketasining ikkinchi sinovi, birinchisi 13-aprelda amalga oshirilgan, deya qayd etadi Yonhap. Sinovlar Pxenyanning Amerika razvedkachi samolyotlari mamlakat havo hududiga bostirib kirgani haqidagi da’volari fonida bo‘lib o‘tdi.
Izoh (0)