Oliy Majlis Qonunchilik palatasi va Senatining qo‘shma majlisida O‘zbekiston saylangan prezidenti Shavkat Mirziyoyev tantanali qasamyod qilib, o‘z lavozimiga kirishdi. Tantanali tadbirda so‘zga chiqqan davlat rahbari demokratiya va ochiqlik siyosati izchil davom ettirilishini ma’lum qildi.
Prezident bozor tamoyillariga asoslangan kuchli iqtisodiyot bilan birga ajdodlarning boy merosi va milliy qadriyatlarga asoslangan kuchli maʼnaviyatga tayanilishini ta’kidladi.
“Saylovoldi uchrashuvlarida milliy o‘zligimiz va ezgu qadriyatlarimizni asrab-avaylash, madaniyat, maʼnaviyat va maʼrifat sohalarini rivojlantirish, yosh avlodni Vatanga muhabbat va sadoqat ruhida tarbiyalash bo‘yicha belgilab olgan vazifalarni sizlar bilan, keng jamoatchilik bilan birgalikda amalga oshiramiz.
O‘zbekistonda barcha siyosiy huquqlar qatorida vijdon va eʼtiqod erkinligi kafolatlari so‘zsiz taʼminlanadi. Biz demokratiya va ochiqlik siyosatini izchil davom ettirib, konstruktiv muxolifat faoliyatini, so‘z va matbuot erkinligi, fuqarolarning axborot olish, undan foydalanish va tarqatishga bo‘lgan huquqlarini kafolatlaymiz.
O‘zbekiston fuqarolari dunyoning qaysi o‘lkasi yoki mintaqasida bo‘lmasin, qonunlarimiz himoyasida bo‘ladi. Chet eldagi vatandoshlarimiz bilan aloqalarni yanada mustahkamlaymiz” — dedi prezident.
2019-yil yakunida Shavkat Mirziyoyev mamlakat ichida siyosiy muxolifat paydo bo‘lishi, xalqning barcha muammolarini bilishi uchun sharoit yaratish zarurligini taʼkidlagandi.
Izoh (0)