Andijondagi tergov hibsxonasida 12 nafar IIB xodimi tomonidan urib o‘ldirilgani aytilgan marhum Sanjarbek Mamajonov o‘limidan avval tergov hibsxonasining kuzatuv kameralari yo‘q bo‘lgan joyida saqlangani maʼlum bo‘ldi. Bu haqda Toshkent viloyati sudining apellyatsiya instansiyasida so‘z olgan sudlanuvchi U.A. gapirib berdi.
Andijondagi 3-sonli tergov hibsxonasida boshliq yordamchisi, smena boshlig‘i vazifasida ishlab kelgan sudlanuvchining aytishicha, u mahkum Sanjarbek Mamajonovni 2022-yil 20-mart kuni soat 08:00 da qabul qilib olib, 21-mart kuni soat 10:00 da boshqa hamkasbiga topshirgan.
Sudlanuvchining sudda maʼlumot berishicha, mahkum Sanjarbek Mamajonov uning navbatchiligi kuni tobi qochib, g‘alati gaplarni gapirgan.
“Hoji aka, meni qo‘yvoringlar, men mol bozoriga borishim kerak”, deb g‘alati gaplarni gapirgan edi, — deydi sudda voqeni yodga olgan U.A.
Uning yana yodga olishicha, mahkumning tobi qochgach, unga shifokor tomonidan yordam ko‘rsatilgan. Shuningdek, kameradoshlarining shikoyatiga ko‘ra, tutqanog‘i tutib qolmasligi uchun boshqa kameraga ko‘chirilgan. So‘ngra juda terlab, usti nam bo‘lib ketgani bois, boshqa bir mahkumning kiyimini ham kiygan. Shundan so‘ng, tergov hibsxona xodimlari uni kuzatuv kameralaridan pana joy — kirish yo‘laklaridagi zinapoya oldida saqlab turgan.
Sud majlisida sudlanuvchiga savol bilan yuzlangan prokuratura xodimi “Sog‘lig‘ida muammo bo‘lgan mahkumni nega ‘sanchast’ga yotqizish yoki tutqanog‘i bo‘lsa o‘ziga zarar yetkazmaydigan maxsus kameraga joylashtirish harakatini ko‘rmadingiz? Bu sizning vazifangiz edimi? Nega uni zinopoyalar oldida, kuzatuv kamelaridan panada saqladingiz?”, — deya savol berdi.
Prokuror savoliga javob bergan sudlanuvchi mahkumni “sanchast”ga joylashtirish bo‘yicha shifokor tavsiyasi yo‘qligini, tutqanoq kasalligi bilan og‘riganlar saqlanuvchi maxsus kameraga joylashtirmaganining boisi esa, mahkum terlab ketayotgani bois, unga havo kerak deb o‘ylagani uchun havo esib turgan zinapoya oldiga olib chiqqanini maʼlum qildi.
Men mahkumni uning harakatlaridan shikoyat qilayotgan kameradoshlari oldida qoldirishim ham mumkin edi. Ammo unga biror gap bo‘lishidan qo‘rqqanim sabab, uni yonimda olib o‘tirdim. Unga qayg‘urganimdan shunday qildim. Biz mahkumlar xavfsizligini taʼminlasak, navbatchilikdan tashqaridagi paytimiz, yaʼni uyimizda xotirjam bo‘lamiz”, — dedi sudlanuvchi.
Mazkur voqea yuzasidan bildirilgan dastlabki maʼlumotlardan maʼlum bo‘lishicha, tergov hibsxonasining 58-kamerasiga o‘tkazilgan mahkum o‘zini yomon his qilayotganini aytgach, 20-mart kuni 49-kameraga joylashtirilgan. Mahkum bu kamerada ham tobi yo‘qligini aytib, boshqa mahkumlarga xalal bergach, hibsxonaning 7 nafar xodimi tomonidan kamerasiz xonada to‘rt soatdan ortiq vaqt davomida ayovsiz kaltaklanib, aynan shu kamerada nomaʼlum muddatga ushlab turilgan. Keyin esa soat 11:00 larda mahkumning sog‘lig‘i yomonlashganiga qaramasdan boshqa kameraga o‘tkazilgan. Mahkum o‘sha kamerada boshqa bir mahkum tomonidan ham kaltaklangan. O‘z vaqtida yordam ko‘rsatilmaganligi sababli o‘sha kuni soat 14:30 da vafot etgan.
- Sud marhumning o‘limiga sababchi deb topgan IIV JIEDga qarashli 3-son tergov hibsxonasida ishlovchi 6 nafar xodimning har birini 1 yil 6 oy muddatga ichki ishlar organlari tizimida ishlash huquqidan mahrum qilgan holda 4 yil muddatga ozodlikdan mahrum qilgandi.
- Shuningdek, qolgan 6 nafar xodim esa 1 yil 6 oy muddatga ichki ishlar organlari tizimi va shifokorlik lavozimlarida ishlash huquqidan mahrum etilib, 3 yilga ozodlikni cheklash jazosi bilan jazolangandi.
- Bundan tashqari, marhum mahbusni kamerada kaltaklagan mahkum J.U.ga 4 yil 1 oy muddatga ozodlikdan mahrum qilish jazosi tayinlangan.
- 32 yoshli mahbusni urib o‘ldirishda ayblanib, jazoga tortilgan 12 nafar tergov hibsxona xodimlarining 10 nafari Jinoyat ishlari bo‘yicha Angren shahar sudining 2023-yil 22-may kuni o‘qilgan hukmidan norozi bo‘lib, Toshkent viloyati sudining appelyatsiya instansiyasiga shikoyat qilgan.
- Ularning shikoyati sudya Saidahror Umarov raisligida ko‘rib chiqilmoqda.
Izoh (2)
жуда зур эртак
жуда зур эртак