Toshkent shahrining mahalliy budjetidan “Paxtakor” futbol klubi hisobiga 7 milliard so‘m mablag‘ o‘tkazib beriladi. Shahar hokimi Shavkat Umrzoqovning bu haqdagi tegishli qarori “E-qaror” yagona elektron tizimiga joylashtirildi.
Hujjatda yozilishicha, “Paxtakor” FK MCHJning ish haqi va unga tenglashtirilgan to‘lovlar, kommunal xizmatlar va o‘yin o‘tkazish xarajatlarini qoplab berish maqsadida Toshkent shahar hokimligining klub ustav fondidagi ulushini oshirish hisobiga mahalliy budjetning zaxira jamg‘armasi hisobidan 7 milliard so‘m mablag‘ ajratiladi.
Shu sababli Iqtisodiyot va moliya bosh boshqarmasi 2023-yil Toshkent shahar mahalliy budjetiga tegishli o‘zgartirishlar kiritadi. G‘aznachilik boshqarmasi ajratilgan mablag‘ni o‘rnatilgan tartibda moliyalashtirish choralarini ko‘radi.
“Paxtakor” FK MCHJ (rahbar: Dmitriy Adisman) klub ustav fondini taqsimlangan mablag‘lar hisobiga oshirish choralarini ko‘radi hamda mablag‘larning maqsadli sarflanishini ta’minlaydi.
Shavkat Umrzoqov buyruqni imzolashda Vazirlar Mahkamasining “Futbol klublari faoliyatining samaradorligini oshirish chora-tadbirlari to‘g‘risida” 2021-yil 30-apreldagi 261-son qarori (unda Toshkent shahar hokimligi “Bunyodkor” va “Paxtakor” jamoalariga bosh homiy ekani ko‘rsatilgan), shuningdek, “Paxtakor” klubining 2023-yil 13-iyuldagi murojaati inobatga olinganini qayd etgan.
Izoh (0)