“Qonunlarni, odamlarni mensimaydigan, korrupsiya balosiga berilgan har qanday rahbar bilan xayrlashamiz” — Shavkat Mirziyoyev

O‘zbekistonning saylangan prezidenti Shavkat Mirziyoyev 14-iyul kuni tantanali qasamyod qilib, o‘z lavozimiga kirishdi. Tadbirda so‘zga chiqqan davlat rahbari barcha bo‘g‘indagi rahbarlarga chiroyli, balandparvoz gapiga qarab emas, faoliyatining aniq natijasiga qarab baho berilishini aytdi.

“Odamlar endi bizdan yangi amaliy ishlarni kutyapti. Millionlab insonlar — ota-onalarimiz, opa-singillarimiz, o‘g‘il-qizlarimiz bugun bizga umid va ishonch bilan ko‘z tikib turibdi. Ana shunday umid va ishonchni oqlash, erishgan yutuqlarimizni yangi natijalar bilan mustahkamlash bizning nafaqat vazifamiz, balki insoniy burchimizga aylanishi shart”, — dedi prezident.

Shavkat Mirziyoyev qonun va odamlarni mensimaydigan, korrupsiyaga berilgan har qanday rahbardan voz kechilishini aytdi.

“Qonunlarni, odamlarni mensimaydigan, ularga qo‘pol munosabatda bo‘ladigan, byurokratiya va korrupsiya balosiga berilgan har qanday rahbar bilan — u vazir yoki hokim bo‘ladimi, boshqa mas’ul vazifadagi amaldor bo‘ladimi – salbiy harakatlari bilan davlat obro‘siga putur yetkazayotgan bunday kishilar bilan uzil-kesil xayrlashamiz”  — dedi davlat rahbari.

Shavkat Mirziyoyev ularning o‘rniga bilimli, vatan va xalq tashvishi bilan yashaydigan yosh-yosh yigit-qizlar qo‘yilishini aytdi.

“Mana, safimizga yurtimizdagi, chet eldagi nufuzli oliygohlarda o‘qigan, yirik kompaniyalarda ishlagan qancha-qancha salohiyatli yoshlar kirib kelmoqda. Men ularning timsolida, avvalo, ertangi kunimizning yangi rahbarlarini, hudud, tarmoq va sohalarning mohir boshqaruvchilarini ko‘raman”, — deya qayd etdi prezident.