Ипакчилик ва жун саноатини ривожлантириш қўмитаси раиси Баҳром Шарипов “Кун.уз” ва унинг журналисти Шокир Шариповни судга берди, бироқ кейин суддан ишни кўрмасдан қолдиришни сўради.
12 июнь куни нашр журналист Шокир Шариповнинг “Давлат амалдорининг ‘ипакдан тўқилган’ бизнес тўри. Соҳа шахсий томорқага айлантирилганми?” сарлавҳали суриштирувини эълон қилганди. Унда Ипакчилик қўмитаси раиси, яқингача қўмита билан бирга “Ўзипаксаноат”ни ҳам бошқариб келган Баҳром Шарипов ўзига алоқадор кўплаб компаниялар орқали ипак саноатида шахсий бизнесни юритаётгани айтилган. Мақолада Баҳром Шариповнинг бизнес тузилмалари асосини унинг турмуш ўртоғи ҳисобланган Сайёра Шарипова номига очилган фирмалар ташкил қилиши қайд этилган.
“Ипакчиликка масъул қўмита ва уюшма вакиллари биз билан учрашувда Баҳром Шарипов аслида тадбиркор бўлгани, ипакчилик йўналишида тадбиркорлик фаолияти билан соҳа раҳбарлигига келгунга қадар ҳам шуғулланганини маълум қилди. Аммо суриштирувда туғилган саволларга жавоб берилмади”, — дейилади Шокир Шарипов мақоласида.
Шундан сўнг Ипакчилик ва жун саноатини ривожлантириш қўмитаси раиси “Кун.уз” ва унинг журналисти Шокир Шариповни судга берди.
“Газета.уз”нинг ёзишича, у ўз даъво аризасида “Кун.уз” мақоласидаги маълумотларни асоссиз деб атади ҳамда бу ўзи ва оиласининг обрўсига путур етказганини қайд этди. Таъкидлашича, у тасодифан Ипакчилик ва қоракўлчиликни ривожлантириш қўмитаси раҳбари ҳамда “Ўзипаксаноат” уюшмаси раиси лавозимларига тайинланиб қолмаган.
Баҳром Шарипов судланувчилардан раддия эълон қилиш, омма олдида кечирим сўраш ҳамда “Кун.уз” ва журналист Шокир Шариповдан маънавий зарар учун 1 миллиард сўм ундиришни талаб қилган.
Блогер ва ҳуқуқшунос Хушнудбек Худойбердиев 14 июль куни Баҳром Шарипов судга берилган даъво аризасини қайтариб олганини маълум қилиб, унинг судга юборган аризасини илова қилди.
Унда Ипакчилик қўмитаси раиси Баҳром Шарипов “Кун.уз” нашри ва журналист Шокир Шарипов устидан шахснинг шаъни, қадр-қиммати ва ишчанлик обрўсини ҳимоя қилиш юзасидан судга берилган даъво аризасини қайтариб олди ва суддан ишни кўрмасдан қолдиришни сўраган.
Изоҳ (0)