Samarqandda taksi haydovchisi bolani itlar hamlasidan qutqarib qolgani to‘g‘risida xabar berilgandi. Samarqand shahar hokimligining ma’lum qilishicha, bolani qutqarib qolgan fuqaro taqdirlangan.
Samarqand shahridagi “Yoshlar” mahalla fuqarolar yig‘ini hududida joylashgan avtoturargoh oldida ketayotgan bolaga itlar hamla qilgan, taksi haydovchisi uni qutqarib qolgandi.
Holat 8-iyul kuni sodir bo‘lgan, biroq videotasvirlar kuni kecha ijtimoiy tarmoqlarda tarqaldi. Qayd etilishicha, o‘sha kuniyoq bolaga tibbiy-psixologik yordam ko‘rsatilgan va ayni paytda uning holati yaxshi.
11-iyul kuni Samarqand shahar hokimligida shahar hokimi Fazliddin Umarov hamda shahar ichki ishlar organlari faoliyatini muvofiqlashtirish boshqarmasi boshlig‘i Ismatjon Ibragimov bolaning hayotini saqlab qolgan taksi haydovchisi, 23 yoshli Firdavs Ahmedov va uning ota-onasiga minnatdorlik bildirgan.
Shuningdek, Firdavs Ahmedovga esdalik sovg‘alari topshirilgan.
Samarqand viloyati IIB axborot xizmati rahbarining ma’lum qilishicha, bolaga tashlangan itlarning egasiga nisbatan Maʼmuriy javobgarlik to‘g‘risidagi kodeksning 110-moddasi (it va mushuk boqish qoidalarini buzish) bilan maʼmuriy bayonnoma rasmiylashtirilgan.
Bundan oldin Sirdaryo viloyati Yangiyer shahrida 21 yoshli yigit cho‘kib ketayotgan ona va bolani qutqarib qolgandi. Keyinroq Sirdaryo viloyati hokimi va viloyat Favqulodda vaziyatlar boshqarmasi boshlig‘i uni esdalik sovg‘alari bilan taqdirladi. Shu bilan birga, yigit FVVga ishga qabul qilinish bo‘yicha tavsiya qilingan.
Izoh (0)