Ijtimoiy tarmoqlarda Jizzaxda qarovsiz qolgan itlarga vahshiylik bilan munosabatda bo‘lingani haqida xabar e’lon qilindi. Mazkur masala yuzasidan viloyat ichki ishlar boshqarmasi tomonidan o‘rganish olib borildi.

Holat yuzasidan surishtiruv ishlari davomida “Tinchlik” mahallasi raisi A.E.ning murojaati asosida bolalarni qo‘rqitib, qarovsiz yurgan it 19-iyul kuni shahar obodonlashtirish boshqarmasining “Yovvoyi hayvonlarni tutish brigadasi” xodimi E.I. tomonidan otilgani ma’lum bo‘ldi.

Bu jarayonda mas’ul xodim sanitariya-gigiyena qoidalari, shuningdek, o‘qotar quroldan belgilangan tartibni buzgan holda otishda ifodalangan huquqbuzarlik sodir etgani aniqlandi. Holat yuzasidan Ma’muriy javobgarlik to‘g‘risidagi kodeksning 185-moddasida (o‘qotar qurollardan belgilangan tartibni buzgan holda otish) ko‘rsatilgan huquqbuzarlik alomatlari mavjudligi sababli E.I.ga nisbatan qonuniy chora ko‘rildi.

Telegram’dagi “Ekolog.uz” kanalida aniqlik kiritilishicha, it otilgan o‘qdan nobud bo‘lgan.

“Unutmang, faqatgina O‘zbekistonda boshpanasiz hayvonlar bolalarni qo‘rqitib yuradi, hayvonlar o‘zidan o‘zi bolalarga tashlanib qoladi, o‘zidan o‘zi ularni tishlab oladi. Qachon bunaqa aqlga sig‘mas eskicha munosabatlardan yiroqlashamiz? Qo‘rqitgani borasida isbot bormi? Qo‘rqitgan bo‘lsa, otib o‘ldirish kerak deganimi bu? Unutmang, hech bir hayvon siz ozor yetkazmasangiz, sizga ozor yetkazmaydi”, — deyilgan kanal xabarida.