Самарқандда такси ҳайдовчиси болани итлар ҳамласидан қутқариб қолгани тўғрисида хабар берилганди. Самарқанд шаҳар ҳокимлигининг маълум қилишича, болани қутқариб қолган фуқаро тақдирланган.
Самарқанд шаҳридаги “Ёшлар” маҳалла фуқаролар йиғини ҳудудида жойлашган автотураргоҳ олдида кетаётган болага итлар ҳамла қилган, такси ҳайдовчиси уни қутқариб қолганди.
Ҳолат 8 июль куни содир бўлган, бироқ видеотасвирлар куни кеча ижтимоий тармоқларда тарқалди. Қайд этилишича, ўша куниёқ болага тиббий-психологик ёрдам кўрсатилган ва айни пайтда унинг ҳолати яхши.
11 июль куни Самарқанд шаҳар ҳокимлигида шаҳар ҳокими Фазлиддин Умаров ҳамда шаҳар ички ишлар органлари фаолиятини мувофиқлаштириш бошқармаси бошлиғи Исматжон Ибрагимов боланинг ҳаётини сақлаб қолган такси ҳайдовчиси, 23 ёшли Фирдавс Аҳмедов ва унинг ота-онасига миннатдорлик билдирган.
Шунингдек, Фирдавс Аҳмедовга эсдалик совғалари топширилган.
Самарқанд вилояти ИИБ ахборот хизмати раҳбарининг маълум қилишича, болага ташланган итларнинг эгасига нисбатан Маъмурий жавобгарлик тўғрисидаги кодекснинг 110-моддаси (ит ва мушук боқиш қоидаларини бузиш) билан маъмурий баённома расмийлаштирилган.
Бундан олдин Сирдарё вилояти Янгиер шаҳрида 21 ёшли йигит чўкиб кетаётган она ва болани қутқариб қолганди. Кейинроқ Сирдарё вилояти ҳокими ва вилоят Фавқулодда вазиятлар бошқармаси бошлиғи уни эсдалик совғалари билан тақдирлади. Шу билан бирга, йигит ФВВга ишга қабул қилиниш бўйича тавсия қилинган.
Изоҳ (0)